Civilnet
Իրանի արտաքին գործերի նախարարությունը հուլիսի 12-ին կանչել է Թեհրանում Ռուսաստանի դեսպան Ալեքսեյ Դեդովին: Այդ մասին հաղորդել է Իրանի արտաքին քաղաքական գերատեսչությունը:
Իրանը անհամաձայնություն է հայտնել Պարսից ծոցի երեք կղզիների վերաբերյալ Ռուսաստանի դիրքորոշման առնչությամբ, որը հնչել է հուլիսի 10-ին Մոսկվայում անցկացված Ռուսաստանի և Պարսից ծոցի արաբական պետությունների համագործակցության խորհրդի նիստի համատեղ հայտարարության ժամանակ:
Խոսքը Աբու-Մուսա, Մեծ և Փոքր Թոմբ կղզիների մասին է, որոնց պատկանելության վերաբերյալ հակասություններ կան Իրանի ու Արաբական Միացյալ Էմիրությունների (ԱՄԷ) միջև:
«Իրանի ԱԳ նախարարի տեղակալ Ալիռեզա Էնայաթին Ռուսաստանի դեսպանի հետ հանդիպմանը ընդգծել է դրանց անվերապահ պատկանելությունը Իրանին՝ պահանջելով Մոսկվայից փոխել իր դիրքորոշումը խնդրի հարցում»,- ասված է Իրանի ԱԳՆ-ի տարածած հաղորդագրությունում:
Ըստ հայտարարության՝ Մոսկվայում անցկացված խորհրդի նիստի ժամանակ Կրեմլը պաշտպանել է կղզիների հարցում արաբական պետությունների դիրքորոշումը:
Ռուսաստան-Պարսից ծոցի արաբական պետությունների համագործակցության նախարարական խորհրդի վեցերորդ նիստը կայացել է Ռուսաստանի ԱԳՆ ղեկավար Սերգեյ Լավրովի և օմանցի իր գործընկեր Բադրա Ալ-Բուսաիդիի նախագահությամբ: Դրա աշխատանքներին մասնակցել են Բահրեյնի, Քուվեյթի, Սաուդյան Արաբիայի, Կատարի, ԱՄԷ-ի արտգործնախարարները:
Պատմություններ
