Ադրբեջանցի իրավապաշտպանը «կտտանքների է ենթարկվել և կալանավորվել»

Իսմի Աղաև, OC Media

Ադրբեջանցի իրավապաշտպան, աշխատանքային իրավունքներով զբաղվող Աֆիադին Մամեդովը ոստիկանության հրահանգներին չենթարկվելու մեղադրանքով 30-օրյա կալանքի է դատապարտվել։ Ըստ ամենայնի, նրան խոշտանգել են և թույլ չեն տվել փաստաբան ունենալ:

Աշխատավորների արհմիությունների կոնֆեդերացիայի նախագահ և «Ժողովրդավարություն 1918» շարժման անդամ Մամեդովը կալանավորվել է օգոստոսի 1-ին և հինգշաբթի վերցվել վարչական կալանքի։ Նույն օրը նա հացադուլ է սկսել՝ ի նշան դատարանի վճռի դեմ բողոքի։

«Ժողովրդավարություն 1918» շարժման նախագահ Ահմադ Մամեդլին հինգշաբթի OC Media-ին ասել է, որ Մամեդովը խոշտանգումների է ենթարկվել կալանքի տակ գտնվելու ժամանակ:

Սա Մամեդովի երրորդ կալանքն է մեկ տարուց պակաս ժամանակահատվածում՝ ոստիկանությանը չենթարկվելու մեղադրանքով: Ակտիվիստը պնդում է, որ անմեղ է և հայտարարում է, որ իշխանությունները թիրախավորում են իրեն աշխատանքային իրավունքների պաշտպանությանն ուղղված իր աշխատանքի համար։

Մամեդլին OC Media-ին ասել է, որ Մամեդովին առևանգել են քաղաքացիական հագուստով ոստիկանները՝ առաքիչների կազմակերպած բողոքի ցույցից վերադառնալիս։

«Նրան բերման ենթարկողները Բաքվի քաղաքային ոստիկանական բաժանմունքի աշխատակիցներ են»,- ասել է Մամեդլին՝ հավելելով, որ իր գործընկերոջը մերժել են փաստաբան տրամադրել, և կալանքի վճիռը կայացվել է առանց փաստաբանի։

Առաքիչները բողոքում էին նոր օրենքի դեմ, որը պարտավորեցնում է նրանց իրենց սկուտերներն ու մոպեդները գրանցելու համար մաքսային հայտարարագիր ներկայացնել։