Civilnet
17:40
Ժամը 17:30-ի դրությամբ իրադրությունն առաջնագծում հարաբերականորեն կայուն է, հաղորդում է պաշտպանության նախարարությունը։
***
16:15
Ադրբեջանական սադրանքի հետևանքով հայկական կողմն ունի 4 զոհ, 1 վիրավոր։ Այդ մասին հայտնում է ՊՆ մամուլի քարտուղար Արամ Թորոսյանը։
«Զոհված զինծառայողների տվյալները, ինչպես նաև վիրավոր զինծառայողի առողջական վիճակի մասին պաշտպանության նախարարությունը հաղորդագրություն կհրապարակի ավելի ուշ՝ զինծառայողների ընտանիքներին պատշաճ, սահմանված կարգով իրազեկելուց հետո»,- Ֆեյսբուքի իր էջում գրել է Թորոսյանը։
***
15:50
Սոթքի հատվածում հակառակորդի կրակից զոհվել են Մասիսի բնակիչներ Անդրանիկ Անտոնյանը և Արսեն Մկրտչյանը, հայտնում է Մասիսի քաղաքապետ Դավիթ Համբարձումյանը։
«Խորը ցավով տեղեկացա, որ Սոթքի հատվածում տեղակայված հայկական դիրքերի ուղղությամբ ադրբեջանական ԶՈՒ կրակի հետևանքով զոհվել են մեր համայնքի բնակիչներ Անդրանիկ Արշակի Անտոնյանը և Արսեն Ալեքսանդրի Մկրտչյանը: Ցավակցում եմ մեր տղաների ընտանիքների անդամներին, հարազատներին»,- Ֆեյսբուքի իր էջում գրել է Համբարձումյանը։
***
15:22
Պաշտպանության նախարարությունը տեղեկացնում է, որ ժամը 15:15-ի դրությամբ իրադրությունն անփոփոխ է. կրակի ինտենսիվության նվազումը պահպանվում է:
***
14:34
Ժամը 14:30-ի դրությամբ կրակի ինտենսիվության նվազումը պահպանվում է, հայտնում է ՊՆ մամուլի քարտուղար Արամ Թորոսյանը։
«Իրադրության վերաբերյալ պաշտպանության նախարարությունը հանդես կգա լրացուցիչ հաղորդագրությամբ»,- իր ֆեյսբուքյան էջում գրել է Թորոսյանը։
14:20
Պաշտպանության նախարարությունը հայտնում է, որ ժամը 14:15-ի դրությամբ Ադրբեջանի ԶՈւ-ի կրակի ինտենսիվությունը Սոթքի և Նորաբակի հայկական դիրքերի ուղղությամբ նվազել է:
***
Ադրբեջանական ստորաբաժանումները Սոթքի հատվածում շարունակում են հրաձգային զենքերից և ականանետից կրակը, հաղորդում է պաշտպանության նախարարությունը։
«13:30-ի դրությամբ Ադրբեջանի ԶՈւ ստորաբաժանումները շարունակում են հրաձգային զենքերից և ականանետից կրակը Սոթքի և Նորաբակի հատվածում տեղակայված հայկական դիրքերի ուղղությամբ»,- ասված է հաղորդագրությունում։
ՊՆ-ն նաև հայտնում է, որ ժամը 12:50-ի սահմաններում Ադրբեջանի ԶՈւ ստորաբաժանումները Սոթքի ուղղությամբ կիրառել են ԱԹՍ և ականանետ:
«Մշտադիտարկման արդյունքում Սոթքի հատվածում արձանագրվում են Ադրբեջանի ԶՈւ ռազմական տեխնիկայի, լրացուցիչ անձնակազմի կենտրոնացման միջոցառումներ»,- նշում են Հայաստանի պաշտպանական գերատեսչությունից։
***
Ավելի վաղ Հայաստանի պաշտպանական գերատեսչությունը հաղորդել էր, որ սեպտեմբերի 1-ին՝ ժամը 07:50-ից սկսած, հակառակորդը ինտենսիվ կրակ է բացել Սոթքի հատվածում տեղակայված հայկական դիրքերի ուղղությամբ։ Ադրբեջանի ԶՈւ-ն, տարբեր տրամաչափի հրաձգային զենքերից զատ, կիրառել էր նաև ականանետ։
Ադրբեջանական կրակի հետևանքով հայկական կողմն ունի 2 զոհ, 1 վիրավոր:
Ադրբեջանի պաշտպանության նախարարությունը հայտնում է 3 ադրբեջանցի զինծառայողի վիրավորվելու մասին։ Ըստ հակառակորդի՝ հայկական կողմը կիրառել է հարվածային ԱԹՍ։
Պատմություններ
