Ադրբեջանի արևմտյան շրջանները Նախիջևանին կապող ճանապարհը կարող է շրջանցել Հայաստանը․ Բայրամով

«Ադրբեջանի արևմտյան շրջանները Նախիջևանին կապող ճանապարհը կարող է շրջանցել Հայաստանը», հայտարարել է Ադրբեջանի արտգործնախարար Ջեյհուն Բայրամովը հունգարական և ադրբեջանական լրատվամիջոցներին տված հարցազրույցում:

«Ադրբեջանը որպես «պլան Բ» ունեցող պետություն կշարունակի այդ ուղղությամբ աշխատանքները և հնարավոր է, որ Հայաստանը դուրս մնա այդ հաղորդակցությունից, ինչից կտուժի հենց ինքը»,- ասել է Բայրամովը։

Ադրբեջանի արտգործնախարարն ակնարկել է Իրանի տարածքով անցնող ճանապարհը: Մասնավորապես, Բաքուն ու Թեհրանը 2022 թվականի մարտի 11-ին փոխըմբռնման հուշագիր են ստորագրել Ադրբեջանը Նախիջևանին կապող նոր ուղու շուրջ, որի կառուցումը նախատեսված է Իրանի տարածքով՝ Հայաստանի հարավային սահմանից 5 կմ հեռավորությամբ:

Բայրամովը, անդրադառնալով 2020-ի եռակողմ հայտարարությանը, ասել է հետևյալը․ «Ադրբեջանի արևմտյան շրջանների և Նախիջևանի Ինքնավար Հանրապետության միջև անխոչընդոտ կապի ապահովումն ամրագրված է եռակողմ հայտարարությունում: Այդ նախագծի իրագործումից կշահեն տարածաշրջանի բոլոր պետությունները, այնինչ հարցի շուրջ Հայաստանի դիրքորոշումը ապակառուցողական է, քանզի առաջին հերթին նա ունի տնտեսական եկամուտների կարիք»,- միտքն ամփոփել է Բայրամովը: