Civilnet
ԼՂ-ից բռնի տեղահանված 14 848 աշակերտ արդեն հաճախում են Հայաստանի դպրոցներ։ Այդ մասին հոկտեմբերի 18-ին ՀՀ կառավարությունում ճեպազրույցի ժամանակ ասաց կրթության, գիտության, մշակույթի և սպորտի նախարար Ժաննա Անդրեասյանը։
Նրա տվյալներով` Երևանում դպրոց է հաճախում 4 675 աշակերտ, Արագածոտնում` 707, Արարատում` 2 068, Արմավիրում` 1 290, Գեղարքունիքում` 712, Լոռիում` 883, Կոտայքում` 2 514, Շիրակում` 631, Սյունիքում` 581, Վայոց Ձորում` 322, Տավուշում` 465։
«Մի փոքր դանդաղել է երեխաների գրանցումը դպրոցներում, ինչը պայմանավորված է այն հանգամանքով, որ արդեն գործարկվել է վարձակալության ծրագիրը, և կարծում եմ, մարդիկ հիմա զբաղված են դրանով ու նաև դրանով են պայմանավորում իրենց երեխաների դպրոց գնալը։ Հորդորում եմ մեր հայրենակիցներին` առաջին իսկ հնարավորության պարագայում դպրոց դիմել, քանի որ անկախ հետագա տեղաշարժի փոփոխություններից` ամեն օրը կրթությունից երեխայի դուրս մնալու օր է։ Մենք բոլորս պետք է մտածենք երեխաների կրթության գործընթացի շարունակականության մասին»,- ընդգծեց նախարարը։
Անդրեասյանի խոսքով՝ 1 155 ուսանող էլ արդեն հաշվառվել են ՀՀ պետական բուհերում և դրանց մասնաճյուղերում։
Պատմություններ
