Civilnet
Կենտրոնական բանկի նախագահ Մարտին Գալստյանը խորհուրդ է տալիս ինտեգրել տեղահանված արցախցիներին Հայաստանի աշխատաշուկայում, հակառակ պարագայում նրանց ուղղված օժանդակության ծրագրերը կարող են խթանել գնաճը:
Նրա խոսքով՝ Հայաստանում պահանջարկի ընդլայնմանը նպաստելու են նաև Արցախից տեղահանվածներին օժանդակելու նպատակով ՀՀ կառավարության իրականացրած ծրագրերը: 100 հազարից ավել բռնի տեղահանված արցախցիների ինտեգրման և Հայաստանի աշխատաշուկայում իրենց տեղը գտնելու հարցը, նրա խոսքով, կարճաժամկետ և միջնաժամկետ հեռանկարում ազդեցություն ունի դրամավարկային քաղաքականության և գնաճի վրա:
«Կարճաժամկետ հեռանկարում, բնականաբար, կառավարությունն աջակցում է արցախցիներին տարբեր ծրագրերով՝ 100 hազար դրամներ, 40 հազար գումարած 10 հազար դրամներ, և դա շարունակվելու է: Այն նպաստելու է կարճաժամկետ հատվածում ներքին պահանջարկի ավելացմանը»,- ասաց Գալստյանը հոկտեմբերի 31-ին Կենտրոնական բանկում տեղի ունեցած ասուլիսի ժամանակ:
Օժանդակության ծրագրերին զուգահեռ նա կարևորում է աշխատաշուկայում արցախցիների ինտեգրումը, հակառակ պարագայում կառավարության ծախսերը միայն խթանելու են գնաճը:
«Եթե մենք չկարողանանք ներքին պահանջարկի ընդլայնմանը զուգահեռ ստեղծել պայմաններ տեղահանված արցախցիների՝ Հայաստանի աշխատաշուկայում ինտեգրվելու համար, կստացվի, որ առաջարկի տեսանկյունից կունենանք անփոփոխ և սահմանափակ վիճակ: Այսինքն՝ պոտենցիալ ՀՆԱ-ի վրա ազդեցությունը կլինի սահմանափակ: Դրա փոխարեն պահանջարկը կընդլայնվի, ինչը կարող է հանգեցնել որոշակի գնաճային երևույթների», - ասաց Գալստյանը:
***
Սեպտեմբերի 19-ին Ադրբեջանը լայնածավալ հարձակում սկսեց Արցախի դեմ, որը տևեց մեկ օր և ավարտվեց սեպտեմբերի 20-ին հրադադարի մասին պայմանավորվածությամբ: Հաջորդ օրը Ադրբեջանի Եվլախ քաղաքում կայացավ Բաքվի և Ստեփանակերտի ներկայացուցիչների հանդիպումը՝ «վերաինտեգրման հարցերը քննարկելու համար»։ Սեպտեմբերի 28-ին Արցախի նախագահ Սամվել Շահրամանյանը հրամանագիր ստորագրեց 2024-ի հունվարի 1-ից Արցախի Հանրապետության գոյությունը դադարեցնելու մասին։ Արցախի բնակչությունը ենթարկվեց բռնի տեղահանման, Արցախից Հայաստան տեղափոխվեց ավելի քան 100 հազար անձ:
Պատմություններ
