Կառավարությունը 65 մլն դոլար կհատկացնի ատոմակայանի շահագործման երկարացմանը

Հայաստանի ատոմակայանի երկրորդ էներգաբլոկի շահագործման ժամկետի երկարացման նպատակով կառավարությունը 65 մլն դոլարի պայմանագիր կկնքի ռուսական «Ռոսատոմ» ընկերության հետ։ Համապատասխան որոշումը ներառված է կառավարության դեկտեմբերի 14-ի նիստի օրակարգում։ 

Որոշման ընդունումը հնարավորություն կտա ատոմակայանի երկրորդ էներգաբլոկի շահագործման ժամկետը երկարաձգել մինչև 2036 թվականը։ 

Ատոմակայանի ռեակտորային տեղակայանքի համակարգերում և սարքավորումներում բոլոր աշխատանքները պետք է համաձայնեցվեն Հայկական ատոմային էլեկտրակայանի գլխավոր նախագծողի (АО «АЭП»), ռեակտորային տեղակայանքի գլխավոր կոնստրուկտորի (АО ОКБ «ГИДРОПРЕСС»), շահագործման գիտական ղեկավարի (НИЦ «Курчатовский институт») հետ: Բոլոր այդ կազմակերպությունները մտնում են «Ռոսատոմ» պետական կորպորացիայի կառուցվածքի մեջ կամ գտնվում են վերջինիս ազդեցության տիրույթում, պայմանագրերը կարող են կնքվել միայն «Ռուսատոմ Սերվիս» ընկերության միջոցով:

65 միլիոն դոլարը, որ պայմանագրի շրջանակում տրամադրվելու է ռուսական ընկերություններին, հատկացվելու է ատոմակայանին տրամադրվելիք բյուջետային վարկի շրջականում։