Երևանում անցկացվել են Հայաստան-Հունաստան-Կիպրոս պաշտպանական խորհրդակցություններ

Դեկտեմբերի 18-ին ՀՀ պաշտպանության նախարարությունում տեղի են ունեցել հայ-հունական և հայ-կիպրական երկկողմ, ինչպես նաև Հայաստան-Հունաստան-Կիպրոս եռակողմ պաշտպանական խորհրդակցություններ։

Խորհրդակցություններին հունական կողմից մասնակցել են Հունաստանի ազգային պաշտպանության գլխավոր շտաբի միջազգային հարաբերությունների վարչության պետ, բրիգադի գեներալ Վասիլեոս Յամիսի, իսկ կիպրական կողմից՝ Կիպրոսի ազգային գվարդիայի գլխավոր շտաբի միջազգային համագործակցության վարչության պետ, գնդապետ Ալկիվիադիս Ալկիվիադիսի գլխավորած պատվիրակությունները։

Հայաստանի պաշտպանական գերատեսչությունից հաղորդում են, որ խորհրդակցությունների ընթացքում քննարկվել են տարածաշրջանային ու միջազգային անվտանգությանն առնչվող հարցեր։

«Խորհրդակցությունների արդյունքում կողմերը ստորագրել են Հայաստան-Հունաստան, Հայաստան-Կիպրոս և Հայաստան-Հունաստան-Կիպրոս ռազմական համագործակցության 2024 թվականի ծրագրերը, որոնք ներառում են մի քանի տասնյակ միջոցառումներ փոխադարձ հետաքրքրություն ներկայացնող ոլորտներում»,- ասված է հաղորդագրությունում։

https://civilnet.am/news/756746/%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%ab-%d5%b0%d5%b8%d6%82%d5%b6%d5%a1%d5%bd%d5%bf%d5%a1%d5%b6%d5%ab-%d6%87-%d5%af%d5%ab%d5%ba%d6%80%d5%b8%d5%bd%d5%ab-%d5%b0%d5%a1%d5%bf%d5%b8%d6%82%d5%af%d5%bb%d5%b8%d5%af%d5%a1%d5%bf%d5%a1%d5%b5%d5%ab%d5%b6%d5%b6%d5%a5%d6%80%d5%a8-%d5%a6%d5%b8%d6%80%d5%a1%d5%be%d5%a1%d6%80%d5%aa%d5%b8%d6%82%d5%a9%d5%b5%d5%b8%d6%82%d5%b6-%d5%a5%d5%b6-%d5%a1%d5%b6%d6%81%d5%af%d5%a1%d6%81%d6%80%d5%a5%d5%ac/