Civilnet
Վարչապետ Նիկոլ Փաշինյանը հեռախոսազրույց է ունեցել Իրանի նախագահ Էբրահիմ Ռայիսիի հետ, հայտնում են վարչապետի աշխատակազմից։
«Զրուցակիցները քննարկել են հայ-իրանական հարաբերությունների օրակարգային թեմաներին վերաբերող հարցեր: Անդրադարձ է կատարվել երկկողմ պայմանավորվածությունների իրականացման ընթացքին»,- ասված է հաղորդագրությունում։
Նշվում է, որ մտքեր են փոխանակվել նաև 3+3 տարածաշրջանային հարթակի վերաբերյալ․ «Կողմերն օգտակար են համարել Թեհրանում կայացած հանդիպումը»։
Իրանական կողմի հաղորդագրությունում ասվում է, որ հեռախոսազրույցը տեղի է ունեցել հայկական կողմի նախաձեռնությամբ։
Ռայիսիի խոսքով՝ Իրանն աջակցում է Հարավային Կովկասում ենթակառուցվածքների բացմանն ուղղված ցանկացած հարթակի, որը հիմնված կլինի բոլոր երկրների ինքնիշխանության սկզբունքի վրա։
Նա շեշտել է՝ Իրանի քաղաքականությունը Կովկասում հստակ է՝ պետք է քայլեր ձեռնարկվեն, որպեսզի այն չդառնա արտատարածաշրջանային երկրների մրցակցության դաշտ։ Ըստ նրա՝ խնդիրները պետք է լուծվեն տարածաշրջանի երկրների միջոցով։
Պատմություններ
