Վրաստանում դեղագործական ընկերությունները տուգանվել են քաղցկեղի դեղերի կարտելային գներ սահմանելու համար

Շոթա Կինչա, OC Media

Վրացական մի քանի դեղագործական ընկերություն տուգանվել է գրեթե 20 մլն դոլարով՝ «մրցակցությունը համաձայնեցված ձևով սահմանափակելու» և քաղցկեղի դեմ դեղերի գները բարձրացնելու համար։

Ուրբաթ Վրաստանի Ազգային մրցակցության գործակալությունը տուգանել է չորս դեղագործական ընկերությունների՝ Aversi-ին, Gepha-ին, PSP-ին և Mermisi-ին՝ քաղցկեղի բուժման նպատակով պետության տրամադրած դեղերի համար չափից ավելի մեծ գումարներ գանձելու համար:

Գործակալությունը պարզել է, որ ընկերությունների կողմից վաճառվող դեղերի գները «համընկնում են 1 թեթրիի ճշտությամբ»։

Վրաստանի մրցակցային օրենսդրությունն արգելում է «համաձայնեցված գործելակերպը», որն ուղղված է «կանխելու, սահմանափակելու և/կամ խեղաթյուրելու» մրցակցությունը շուկայում՝ «ուղղակի կամ անուղղակի ամրագրելով առքի կամ վաճառքի գները կամ առևտրային որևէ այլ պայման»:

Վրաստանի Ազգային մրցակցության գործակալությունը պնդում է, որ չորս ընկերությունները 2021-ի հունվարից մինչև 2023-ի օգոստոսը միասին աշխատել են և 42 դեղամիջոցի համար բարձր գներ սահմանել։ Ըստ կարգավորող մարմնի՝ իրենք հայտնաբերել են երկու ընկերությունների միջև կարտելային համաձայնագրերի 23 դեպք, երեք բիզնես խմբերի միջև՝ 47, և չորսի միջև՝ 18 դեպք:

Չորս ընկերությունները տուգանվել են 50 մլն լարիով (19,7 մլն դոլար)։ Aversi-ն՝ 14,4 մլն լարի (5,36 մլն դոլար); Gepha-ն 20,3 մլն լարի (7,6 մլն դոլար); PSP-ն՝ 17 մլն լարի (6,36 մլն դոլար) և Mermisi-ն՝ 951 հազ․ լարի (354 հազ․ դոլար):

Գործակալությունը հայտարարել է, որ հետաքննել է մեկ այլ դեղագործական ընկերության՝ SK Impex-ի հնարավոր ներգրավվածությունը սխեմային, սակայն պարզել է, որ ընկերությունը ներգրավված չէ դրանում:

Վրաստանի առողջապահության նախարար Զուրաբ Ազարաշվիլին դեղագործական ընկերությունների գնային մանիպուլյացիաներն անվանել է «ամոթալի»։

«Հաստատվել է, որ այդ ընկերությունները փորձել են արատավոր մեթոդներ կիրառել ժողովրդի և պետության, ամենածանր հիվանդների դեմ»,- ուրբաթ մամուլի ասուլիսին նշել է Ազարաշվիլին։

Այս ամսվա սկզբին Վրաստանի առողջապահության նախարարությունը մեղադրել էր «դեղագործական ընկերություններին» որոշ դեղամիջոցներ խիստ ուռճացված գներով վաճառելու մեջ՝ դեղերի ներմուծման գնի 1000%-ից մինչև 3000%-ով։

Վրաստանի դեղագործական ընկերությունների ասոցիացիան արձագանքել է նախարարությանը՝ նրան մեղադրելով դեղագործական հատվածի դեմ «զրպարտչական» արշավի մեջ։

Ուրբաթ օրվա հայտարարությունից անմիջապես հետո Ասոցիացիան խոստացել է, որ իր անդամ Aversi-ն, PSP-ն և Mermisi-ն տուգանքները կվիճարկեն դատարանում: