Կառավարությունը ճանապարհ կկառուցի «Մայլեռ»-ի համար

Կառավարությունը որոշել է «Մայլեռ» ընկերության համար 3 կիլոմետրանոց 8 մետր լայնությամբ ավտոճանապարհ կառուցել։ Համապատասխան որոշման նախագիծը ներառվել է կառավարության հունվարի 18-ի նիստի օրակարգում։ 

«Մայլեռ»-ն անցած տարվանից լեռնային հանգստավայր է շահագործում Արագածոտնի մարզի Եղիպատրուշ գյուղի տարածքում։ Այն ներառում է դահուկուղի, ճոպանուղի, հյուրանոց և այլն։ Ըստ կառավարության համապատասխան որոշման հիմնավորման՝ կառավարության կողմից ճանապարհի կառուցումը ընկերության կողմից ներկայացված ներդրումային ծրագրի մաս է եղել։ 

«Մայլեռ»-ի համար ճանապարհը կառուցելու համար կառավարությունը պլանավորում է ծախսել մոտ 900 միլիոն դրամ։ Բացի այդ, կառավարությունը նախատեսում է ընկերությանը աջակցել կոմունիկացիաների անցկացման հարցում։ 

«Մայլեռ»-ի սեփականատերերը ԱԺ ՀՀԿ խմբակցության նախկին պատգամավոր, ԴԱՀԿ ծառայության նախկին ղեկավար Միհրան Պողոսյանի քեռու որդիներն են՝ Վահան և Տիգրան Հարությունյանները։