Հունվար-փետրվարին ՀՀ-ում արդյունաբերությունն աճել է 29%-ով, արտահանումը՝ երկուսուկես անգամ

Հայաստանում 2024-ի հունվար-փետրվարին նախորդ տարվա նույն ժամանակահատվածի համեմատ տնտեսական ակտիվության ցուցանիշը կազմել է 13,6%, իսկ միայն փետրվարին նույն ցուցանիշն աճել է 16,3%-ով:

Համաձայն Վիճակագրական կոմիտեի հրապարակած տվյալների՝ հունվար-փետրվարին տնտեսական ակտիվության աճին էականորեն նպաստել են արդյունաբերությունը, որն աճել է շուրջ 29%-ով (փետրվարին` 36,4%), առևտրի շրջանառությունը` 24,1%-ով (փետրվարին` 28,3%)։ Շինարարության աճն այս տարվա առաջին երկու ամիսներին կազմել է 10,8% (փետրվարին` 11,7%):

2022-ից ռուսաստանցիների հոսքին զուգահեռ պարբերաբար երկնիշ աճ արձանագրած ծառայությունների ոլորտի աճը դանդաղել է: Ընթացիկ տարվա հունվար-փետրվարին այս բնագավառում աճը կազմել է 5,2%, իսկ միայն փետրվարին` 6%: 

Չնայած արդյունաբերության և տնտեսության մյուս ճյուղերի տպավորիչ աճին, հանրապետությունում էլեկտրաէներգիայի արտադրությունն այս տարվա առաջին երկու ամսում նվազել է շուրջ 5%-ով: Միևնույն ժամանակ Վիճակագրական կոմիտեից հայտնում են, որ ցուցանիշում ներառված չէ էլեկտրաէներգիայի փոխհոսքերի մասով ինքնավար արտադրողների կողմից արտադրված էլեկտրաէներգիան:

2024-ի հունվար-փետրվարին կրկնակի աճել է արտաքին առևտրաշրջանառությունը` կազմելով 5,3 մլրդ դոլար: Միայն փետրվարին նախորդ տարվա փետրվարի համեմատ նույն ցուցանիշն աճել է 2,2 անգամ`հասնելով 3,1 մլրդ դոլարի: 

Ընդ որում, ընթացիկ տարվա առաջին երկու ամսում արտահանումն աճել է 2,6 անգամ` կազմելով ավելի քան 2,5 մլրդ դոլար: Ներմուծման աճը եղել է շուրջ 73%` հասնելով 2,7 մլրդ դոլարի: Բացասական մնացորդը կազմել է ընդհամենը 200 մլն դոլար:

Այսպիսով այս տարվա հունվար-փետրվարին ներմուծման և արտահանման ծավալները գրեթե հավասարվել են։ Սա եզակի դեպք է Հայաստանի տնտեսության համար: Հայաստանում ներմուծումը մշտապես անգամներով գերազանցել է արտահանման ծավալները: