Civilnet
Հայաստանի ԱԳՆ-ն հայտարարություն է տարածել ապրիլի 5-ի լույս 6-ի գիշերը ադրբեջանական կողմից սահմանային հրաձգությունների վերաբերյալ՝ շեշտելով, որ «Ադրբեջանի Հանրապետության Զինված ուժերի սադրիչ գործողություններն արդարացում չունեն»:
«Սահմանի բազմաթիվ հատվածներում անկանոն կրակահերթեր բացելով, մի քանի տասնյակ զինվորական ավտոմեքենաների շարժերով Ադրբեջանն ակնհայտորեն հետապնդել է սադրիչ նպատակ. Հայաստանի Հանրապետության Զինված ուժերի ստորաբաժանումներին դրդել համանման հակադարձ գործողությունների, վերջին շրջանի ադրբեջանական ապատեղեկատվությունը «հիմնավորող» փաստեր ստանալու համար»,- նշվում է հայտարարությունում։
Հայաստանի ԱԳՆ-ն վերահաստատել է, որ Հայաստանը տարածաշրջանում իրադրության սրմամբ հետաքրքրված չէ և Ադրբեջանին կոչ է արել դադարեցնել իրադրության սրմանը հասնելու գործողությունները:
«Չարդարացված ենք համարում նաև Հայաստանի Հանրապետության ինքնիշխան տարածքում պաշտպանական կառույցների ստեղծման վերաբերյալ Ադրբեջանի գնահատականները, քանի որ բանակի և բանակային ենթակառուցվածքների բարեփոխումները ցանկացած երկրի ինքնիշխան իրավունքն է: Միևնույն ժամանակ հիշեցնում ենք, որ Հայաստան-Ադրբեջան պետական սահմանից զորքերի հայելային հետքաշման, սպառազինությունների վերահսկման փոխադարձ մեխանիզմների ներդրման, չհարձակման պայմանագիր կնքելու, պետական սահմանին հարակից տարածքներն ապառազմականացնելու Հայաստանի Հանրապետության առաջարկները Ադրբեջանի կողմից շարունակում են մնալ անարձագանք»,- նշված է հայտարարությունում։
Այսօր ավելի վաղ Ադրբեջանի կողմից սադրանքների մասին հաղորդագրություն էր տարածել Հայաստանի պաշտպանության նախարարությունը՝ նշելով, որ Ադրբեջանը գիշերը անկանոն կրակել է Գեղարքունիքի, Սյունիքի, Տավուշի դիրքերի ուղղությամբ։
ՊՆ-ն հաղորդել է, որ ադրբեջանական ուժերն անկանոն կրակ են բացել Գեղարքունիքի հատվածում Սոթքի, Վերին Շորժայի, Կութի, Սյունիքի հատվածում՝ Արավուսի, Տավուշում՝ Չինարիի, Մովսեսի մոտ տեղակայված ՀՀ ԶՈՒ դիրքերի ուղղությամբ:
«Հայաստանի Հանրապետության զինված ուժերի ստորաբաժանումները, գնահատելով իրադրությունը, հետագա սրմանը նպաստող գործողություններ չեն արել, ինչից հետո իրադրությունը սահմանագծում հանդարտվել է»,- նշել է ՊՆ-ն։
Պատմություններ
