ԱԱԾ-ն մանրամասներ է հայտնել Ներքին Խնձորեսկի հատվածում տեղի ունեցած փոխհրաձգությունից

Հայաստանի ազգային անվտանգության ծառայությունը մանրամասներ է հայտնել ապրիլի 10-ին Ներքին Խնձորեսկի հատվածում հայ և ադրբեջանցի սահմանապահների միջև տեղի ունեցած փոխհրաձգությունից։

«Միջադեպի առթիվ իրականացված ծառայողական քննության արդյունքում պարզվել է, որ ՀՀ ԱԱԾ ՍԶ N զորամասի պարտադիր ժամկետային զինծառայող, նշված հատվածում սահմանապահ ծառայություն իրականացնող վերակարգի ավագ Յ.Ք-ն, տեղեկանալով հովվի և նրա հոտի կողմից մոլորվելու հետևանքով Ադրբեջանի տարածքում հայտնվելու և հովվի կողմից Հայաստանի տարածք վերադառնալու հանգամանքի մասին, վերջինիս և վերակարգի մեջ գտնվող սահմանապահ ծառայողների հետ փորձել են հատել ՀՀ պետական սահմանը և վերադարձնել հոտը՝ այդ կերպ խախտելով սահմանապահ ծառայություն կրելու կանոնները, որն անզգուշությամբ պատճառել է էական վնաս, այն է՝ նշված սահմանապահ հատվածում սկսվել է անհարկի հրաձգություն, ակնհայտ վտանգի է ենթարկվել մարդկանց կյանքն ու առողջությունը, նկարագրված գործողություններն առաջացրել են պետության անվտանգության համար սպառնալիք, ինչպես նաև պետական սահմանի նշված հատվածում պատշաճ հսկողության բացակայության վիճակ»,- ասված է հաղորդագրությունում։

ԱԱԾ-ը հիշեցնում է, որ միջադեպի արդյունքում վիրավորում է ստացել Ադրբեջանի պետական սահմանապահ ծառայության զինծառայող: Ափսոսանք հայտնելով կատարվածի կապակցությամբ՝ ծառայությունից նշում են, որ միջոցներ են ձեռնարկվել հայ սահմանապահների կողմից «ծառայություն կրելու կանոնները խստագույնս պահպանելու և նմանատիպ դեպքերը բացառելու նպատակով»:

«Ծառայողական քննության արդյունքներով ՀՀ քրեական օրենսգրքի համապատասխան հոդվածով առերևույթ հանցանքի մասին պատշաճ հաղորդում է ներկայացվել ՀՀ քննչական կոմիտե, որտեղ նախաձեռնվել է քրեական վարույթ, իրականացվում է նախաքննություն՝ դեպքի հանգամանքները բացահայտելու, մեղավոր անձանց քրեական պատասխանատվության ենթարկելու համար»,- նշված է ԱԱԾ հաղորդագրության մեջ։

https://civilnet.am/news/771354/%d5%b6%d5%a5%d6%80%d6%84%d5%ab%d5%b6-%d5%ad%d5%b6%d5%b1%d5%b8%d6%80%d5%a5%d5%bd%d5%af%d5%ab-%d5%b0%d5%a1%d5%bf%d5%be%d5%a1%d5%ae%d5%b8%d6%82%d5%b4-%d6%83%d5%b8%d5%ad%d5%b0%d6%80%d5%a1%d5%b1%d5%a3%d5%b8%d6%82%d5%a9%d5%b5%d5%b8%d6%82%d5%b6-%d5%a7-%d5%bf%d5%a5%d5%b2%d5%ab-%d5%b8%d6%82%d5%b6%d5%a5%d6%81%d5%a5%d5%ac-%d5%be%d5%ab%d6%80%d5%a1%d5%be%d5%b8%d6%80%d5%be%d5%a5%d5%ac-%d5%a7-%d5%b4%d5%a5%d5%af-%d5%a1%d5%a4%d6%80%d5%a2%d5%a5%d5%bb%d5%a1%d5%b6%d6%81%d5%ab%e2%80%a4-%d5%a1%d5%a1%d5%ae/