ՀՀ-ում աշխատատեղերի թիվն աճել է՝ հասնելով 741 610-ի, աշխատավարձերը ևս բարձրացել են

Պետական եկամուտների կոմիտեի տվյալներով՝ Հայաստանում եկամուտ ստացող աշխատատեղերի թիվը 2024-ի մարտին ավելացել է 5%-ով։

Հարկ վճարողների կողմից եկամտային հարկի և սոցիալական վճարի գծով ներկայացված հաշվետվությունների համաձայն` արձանագրվել է 741 610 աշխատատեղ, որը նախորդ տարվա նույն ժամանակահատվածի համեմատ աճել է 35 316-ով կամ 5%-ով:

Գրանցված աշխատողների թիվը փետրվարին նախորդ տարվա նույն ժամանակահատվածի համեմատ ևս աճել էր 5%-ով՝ հասնելով 733 հազարի։

Թեպետ աշխատավարձների մասին մարտի տվյալները դեռևս հրապարակված չեն, սակայն դրան նախորդած հունվար-փետարվարին ավելացել են ոչ միայն եկամուտ արձանագրած աշխատատեղերը, այլև աշխատավարձերի չափը: 

Ինչպես վկայում են Վիճակագրական կոմիտեի հրապարակած տվյալները, միջին ամսական անվանական աշխատավարձը 2024-ի փետրվարին կազմել է 273 հազար դրամ, ինչը նախորդ տարվա նույն ժամանակահատվածի համեմատ բարձր է 9,3 տոկոսով։

Աճը հիմնականում պայմանավորված է ինչպես պետական, այնպես էլ ոչ պետական հատվածում աշխատավարձերի չափի, համապատասխանաբար՝ 11,2 և 8,5 տոկոսով ավելացմամբ:

Հատկանշական է, որ աշխատավարձի աճը տեղի է ունենում երկրում արձանագրվող գնանկման ֆոնին։ 2024-ի փետրվարին Հայաստանի սպառողական շուկայում 12-ամսյա կտրվածքով գնանկումը կազմել է կազմել է 1,7%: