Civilnet
Աբխազիայի նախագահ Ասլան Բժանիան պաշտոնանկ է արել արտգործնախարար Ինալ Արձինբային, որը հարցաքննության է կանչվել Պետական անվտանգության ծառայություն։
Բժանիան երեքշաբթի Արձինբային աշխատանքից ազատելու մասին հրամանագիր է հրապարակել, որում նշվում է, որ նախարարությունը ժամանակավորապես կգլխավորի փոխարտգործնախարար Իրակլի Տուժբան: Նախագահի կայքը չի բացահայտում Արձինբայի հեռացման պատճառները, իսկ Արձինբան դեռ չի մեկնաբանել իր պաշտոնազրկումը:
Նրա պաշտոնանկությունից անմիջապես հետո տեղական տելեգրամյան Apsny Portal ալիքը, հղում անելով իր աղբյուրներին, հաղորդել է, որ Արձինբան հարցաքննության է կանչվել Պետական անվտանգության ծառայության կողմից, և որ նախագահ Բժանիան նրա նկատմամբ երկրից դուրս գալու արգելք է սահմանել:
Արձինբան ռուսաստանցի նախկին պաշտոնյա է, որը սերտ կապեր է պահպանում Մոսկվայի հետ: Աբխազիայի առաջին նախագահ Վլադիսլավ Արձինբայի ազգականը Աբխազիայի գլխավոր դիվանագետ էր նշանակվել 2021-ի նոյեմբերին։
Մինչև աբխազական քաղաքականություն մտնելը, Արձինբան աշխատել է Ռուսաստանի նախագահի աշխատակազմում, որտեղ 2014-2018 թվականներին ղեկավարել է Ուկրաինայի հետ սոցիալ-տնտեսական հարաբերությունների հարցերով բաժինը:
Նրա հնարավոր պաշտոնանկության մասին լուրեր տարածվեցին 2022-ի սեպտեմբերին, երբ ԱԳՆ աշխատակիցները OC Media-ին անանունության պայմանով ասել էին, որ Արձինբան հրաժեշտ է տվել իր գործընկերներին: Այնուամենայնիվ, Արձինբան կարճ ժամանակ անց հերքեց իր հեռանալու մասին լուրերը՝ պնդելով, որ հայտարարությունը «կատակ» էր։
Արձինբայի հանրային հեղինակությունը վիճելի է եղել 2021-ին պաշտոնը ստանձնելուց ի վեր:
Հայտնի է, որ նա կողմ էր նաև Ռուսաստանի հետ ավելի խորը ինտեգրմանը, որը Աբխազիայում շատերը համարում են սպառնալիք ինքնիշխանությանը:
Նա եղել է վիճահարույց՝ Պիցունդայի պետական ամառանոցը Ռուսաստանին հանձնելու, Բնակարանների մասին օրենքի և Աբխազիայի օտարերկրյա գործակալների օրինագծի եռանդուն կողմնակից:
Նախարարի պաշտոնում Արձինբայի պաշտոնավարման ընթացքում նկատվել է Աբխազիայում գործող միջազգային կազմակերպությունների, այդ թվում՝ ՄԱԿ-ի և ԱՄՆ Միջազգային զարգացման գործակալության (USAID) հետ հարաբերությունների շարունակական սրում:
Պատմություններ
