Փաշինյանը մեկնել է Իրան

Վարչապետ Նիկոլ Փաշինյանն աշխատանքային այցով մեկնել է Իրան, հայտնում են կառավարությունից։

«Վարչապետը Թեհրանում կմասնակցի Իրանի նախագահ Էբրահիմ Ռայիսիի, արտաքին գործերի նախարար Հոսեյն Ամիր Աբդոլլահիանի և նրանց ուղեկցողների հարգանքի տուրքի և ցավակցություն հայտնելու պաշտոնական միջոցառմանը»,- ասված է հաղորդագրությունում։

Իրանի նախագահ Էբրահիմ Ռայիսին զոհվել է մայիսի 19-ին։ Նրան ու ևս ութ անձի տեղափոխող ուղղաթիռը վթարի է ենթարկվել Իրանի հյուսիսարևմտյան Արևելյան Ադրբեջան նահանգում, ըստ ամենայնի, վատ եղանակի պատճառով: Վթարի հետևանքով մահացել է նաև Իրանի արտգործնախարար Հոսեյն Ամիրաբդոլլահիանը։ Ռայիսին վերադառնում էր Ադրբեջանի հետ սահմանին՝ Արաքս գետի վրա ամբարտակի բացման արարողությունից, որին մասնակցել էր նաև Ադրբեջանի նախագահ Իլհամ Ալիևը։

Իրանի նախագահի և մյուս պաշտոնյաների հիշատակի պաշտոնական արարողությանը Ադրբեջանից կմասնակցի վարչապետ Ալի Ասադովը։ ԱՊԱ գործակալության փոխանցմամբ՝ ադրբեջանական պատվիրակության կազմում են նաև արտգործնախարար Ջեյհուն Բայրամովը, Միլի Մեջլիսի Իրան-Ադրբեջան միջխորհրդարանական խմբի անդամները և այլ պաշտոնատար անձինք:

https://civilnet.am/news/777549/%d5%ab%d5%b6%d5%b9-%d5%a7-%d5%bd%d5%ba%d5%a1%d5%bd%d5%be%d5%b8%d6%82%d5%b4-%d5%ab%d6%80%d5%a1%d5%b6%d5%b8%d6%82%d5%b4-%d5%bc%d5%a1%d5%b5%d5%ab%d5%bd%d5%ab%d5%ab%d6%81-%d5%b0%d5%a5%d5%bf%d5%b8%e2%80%a4-stratfor-%d5%ab-%d5%af%d5%a1%d5%b6%d5%ad%d5%a1%d5%bf%d5%a5%d5%bd%d5%b8%d6%82%d5%b4%d5%a8/