Civilnet
Մայիսի 31-ին Ստամբուլում մի խումբ ցուցարարներ բողոքի ակցիաներ են իրականացրել ադրբեջանական պետական նավթագազային պետական ընկերության՝ SOCAR-ի դիմաց։ Հավաքվածները, որոնց թիվը տարբեր հաշվարկներով կազմում էր շուրջ հազար մարդ, պահանջում էին դադարեցնել Թուրքիայի տարածքով ադրբեջանական նավթամթերքի տարանցումը Իսրայել՝ պատճառաբանելով, որ իսրայելական կողմը ստացվող վառելիքը օգտագործում է պաղեստինյան կողմի դեմ ավիահարվածներում։ Ըստ այդ կոչերի՝ SOCAR-ն այդ կերպ սնուցում է իսրայելական հարձակողական գործողությունները։
Ստամբուլաբնակ գրող, հրապարակախոս Ռոբեր Քոփթաշը ՍիվիլՆեթի հետ զրույցում նկատեց, որ ցույցը թեև փոքրաթիվ էր, սակայն առկա խնդիրը մատնանշելու առումով բավականին ազդեցիկ էր և վկայում է, որ Թուրքիան, չնայած պաշտոնական հավաստիացումներին, ամբողջովին չի դադարեցրել իր տնտեսական կապերը Իսրայելի հետ։
Ըստ Քոփթաշի՝ հավաքվածների շրջանում կային ինչպես իսլամական, այնպես էլ ձախակողմյան հայացքներով աչքի ընկնող երիտասարդներ, որոնք իրենց բողոքն արտահայտելիս կարմիր ներկ են օգտագործել։
Քոփթաշը պատմում է, որ ցույցի մասնակիցների դեմ արշավ են իրականացրել Թուրքիայում գործող հատկապես մերձադրբեջանական լրատվամիջոցները, որոնք փորձել են վարկաբեկել բողոքի ակցիայի գաղափարը։
Բանախոսը շեշտում է, որ SOCAR-ի դիմաց բողոքի գործողությունը չի կարելի համարել հակաադրբեջանական, այն ավելի շատ ուղղված էր Պաղեստինի աջակցությանը։
Թուրքական աղբյուրների համաձայն՝ ոստիկանները բերման են ենթարկել 13 անձի, սակայն մի փոքր անց նրանց բոlորին ազատ են արձակել։
Թուրքիայում գործող լրատվամիջոցներից Haber Global-ը, որն ակտիվորեն լուսաբանում է Ադրբեջանի շուրջ կատարվող իրադարձությունները, դեպքերը սադրիչ է համարել։
Պատմություններ
