Հայաստանն ու Ադրբեջանը շատ մոտ են վերջնական համաձայնության հասնելուն․ Բլինքեն
Civilnet
Հուլիսի 10-ին Վաշինգտոնում տեղի է ունեցել Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հանդիպումը՝ ԱՄՆ պետքարտուղար Էնթոնի Բլինքենի նախաձեռնությամբ և մասնակցությամբ։
Հանդիպումից հետո Հայաստանի և Ադրբեջանի ԱԳՆ-ները հրապարակել են հետևյալ հաղորդագրությունը․ «Կողմերը նշել են խաղաղության և միջպետական հարաբերությունների հաստատման վերաբերյալ պատմական պայմանագրի կնքման ուղղությամբ Հայաստանի և Ադրբեջանի կողմից գրանցված առաջընթացը և համաձայնել են շարունակել աշխատանքները։ Կողմերը երախտագիտություն են հայտնել ԱՄՆ պետքարտուղարին հանդիպումը հյուրընկալելու համար»։
Հանդիպման մեկնարկին իր ելույթում ԱՄՆ պետքարտուղարն ասել է, որ Հայաստանն ու Ադրբեջանը շատ մոտ են վերջնական համաձայնության հասնելուն։
«Վերջին մեկուկես տարվա ընթացքում Հայաստանն ու Ադրբեջանը շատ կարևոր աշխատանք են կատարել բանակցությունների և խաղաղության համաձայնագրի կնքման ուղղությամբ։ Սա երկարաժամկետ և արժանապատիվ գործընթաց է և բացառիկ հնարավորություն է երկու երկրների, տարածաշրջանի, ինչպես նաև ԱՄՆ-ի հետ իրենց հարաբերությունների համար: Այս գործընթացի ընթացքում Միացյալ Նահանգները ձգտել է օգնել և աջակցել կողմերին՝ Եվրամիության և Եվրոպայի բազմաթիվ գործընկերների հետ միասին: Այսօր հնարավորություն է ստեղծվել ամփոփելու առաջընթացը, որ ձեռք է բերվել։ Կարծում եմ, որ երկու երկրները շատ մոտ են վերջնական համաձայնության հասնելուն, դրան Միացյալ Նահանգները վճռականորեն կաջակցի: Շնորհակալ եմ այսօրվա հանդիպման համար, որպեսզի նորից գնահատեմ, թե որտեղ ենք և տեսնել, թե էլ ինչ կարող է անել Միացյալ Նահանգները օգնելու հասնել համաձայնության»,- նշել է Բլինքենը։
Պատմություններ
