Փաշինյանը Մակրոնի և Շոլցի հետ հանդիպումներում քննարկել է խաղաղության գործընթացը

Վարչապետ Նիկոլ Փաշինյանը Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ հանդիպումների ընթացքում քննարկել է Հայաստանի և Ադրբեջանի միջև խաղաղության գործընթացին վերաբերող հարցեր։ Վարչապետի աշխատակազմից հայտնում են, որ հանդիպումները կայացել են Եվրոպական քաղաքական համայնքի գագաթնաժողովի շրջանակում։

Մակրոնի հետ հանդիպման արդյունքներով կառավարությունը հետևյալ հաղորդագրությունն է տարածել․ «Քննարկվել են Հայաստան-Ֆրանսիա բազմաոլորտ համագործակցությանը վերաբերող օրակարգային հարցեր: Անդրադարձ է կատարվել Հայաստանի և Ադրբեջանի միջև խաղաղության գործընթացին: Կարևորվել են տարածաշրջանում խաղաղության և կայունության ապահովմանն ուղղված ջանքերը: Զրուցակիցները մտքեր են փոխանակել Հայաստան-Եվրոպական միություն համագործակցության զարգացման շուրջ»։

Օլաֆ Շոլցի հետ հանդիպմանը Նիկոլ Փաշինյանը ներկայացրել է հայկական կողմի սկզբունքային դիրքոշումները սահմանազատման գործընթացի, տարածաշրջանային ենթակառուցվածքների ապաշրջափակման հնարավորությունների վերաբերյալ:

«Քննարկվել են Լեռնային Ղարաբաղից բռնի տեղահանված անձանց հումանիտար խնդիրներին և դրանց լուծման քայլերին վերաբերող հարցեր: Վարչապետ Փաշինյանը մանրամասներ է ներկայացրել այդ ուղղությամբ ՀՀ կառավարության իրաականացրած և առաջիկայում նախատեսվող երկարաժամկետ ծրագրերի, այդ թվում՝ բնակապահովման ծրագրի վերաբերյալ: Բռնի տեղահանվածների կարիքները հասցեագրելու գործում կողմերը կարևորել են նաև միջազգային հանրության շարունակական աջակցությունը»,- ասված է հաղորդագրությունում։

Փաշինյանն ու Շոլցը կարևորել են Հայաստանի և Գերմանիայի միջև քաղաքական ու տնտեսական համագործակցության հետևողական զարգացումը։

https://civilnet.am/news/786048/%d5%a1%d5%a4%d6%80%d5%a2%d5%a5%d5%bb%d5%a1%d5%b6%d5%a1%d5%af%d5%a1%d5%b6-%d5%af%d5%b8%d5%b2%d5%b4%d5%a8-%d5%b4%d5%a5%d6%80%d5%aa%d5%a5%d5%ac-%d5%a7-%d6%83%d5%a1%d5%b7%d5%ab%d5%b6%d5%b5%d5%a1%d5%b6-%d5%a1%d5%ac%d5%ab%d6%87-%d5%b0%d5%a1%d5%b6%d5%a4%d5%ab%d5%ba%d5%b4%d5%a1%d5%b6-%d5%a1%d5%bc%d5%a1%d5%bb%d5%a1%d6%80%d5%af%d5%a8%e2%80%a4-%d5%a1%d5%a3%d5%b6/