Հայաստանի արտաքին առևտուրը 2024-ի կիսամյակում կրկնակի աճել է` հասնելով 18,4 մլրդ դոլարի

Այս տարվա հունիսին նախորդ տարվա նույն ամսվա համեմատ Հայաստանում տնտեսական ակտիվության ցուցանիշն աճել է 7,1%-ով, իսկ կիսամյակի կտրվածքով աճը կազմել է 10,4%:

Վիճակագրական կոմիտեի փոխանցմամբ՝ հունիսին նախորդ տարվա նույն ամսվա համեմատ աճ են գրանցել տնտեսության հետևյալ ճյուղերը. շինարարություն՝ 18%, առևտրի շրջանառություն՝ 16,2%, ծառայություններ՝ 7,8%, արդյունաբերություն՝ 1,4%։

Հունվար-հունիսին նախորդ տարվա նույն ժամանակահատվածի համեմատ առավել մեծ աճ է գրանցել առևտրի շրջանառությունը` 22,9%, շինարարությունը` 18,2%, ծառայությունները՝ 4,4%, արդյունաբերությունը` 18,2%, էլեկտրաէներգիայի արտադրությունը` 5%, գյուղատնտեսությունը` 4%:

Հունիսին հատկապես արդյունաբերության ոլորտում աճի շեշտակի կրճատումը, որն անցած ամիսներին աճում էր առաջանցիկ տեմպերով, բացատրվում է ոսկերչության ոլորտում աճի դինամիկայի կտրուկ անկմամբ: 

Շաբաթներ առաջ ֆինանսների նախարար Վահե Հովհաննիսյանը ՍիվիլՆեթի հետ զրույցում ասել էր, որ ռուսական ոսկու վերաարտահանման հոսքը, որով պայմանավորված էր ոսկերչության ոլորտի ակտիվությունը, այևս Հայաստանով չի գնում, որը հանգեցնելու է այդ բնագավառի աճի դանդաղման: 

Վիճակագրական կոմիտեի հրապարակման համաձայն` չնայած արդյունաբերության ոլորտում աճի դանդաղմանը, հունիսին զգալի աճ է գրանցել արտաքին առևտրաշրջանառությունը` 34,6%` հասնելով 2 մլրդ դոլարի: Արտահանումն աճել է 59,9%-ով` կազմելով 856 մլն դոլար, իսկ ներմուծումը՝ 20,6%-ով` հասնելով 1,1 մլրդ դոլարի: 

2024-ի առաջին կիսամյակում նախորդ տարվա հունվար-հունիսի համեմատությամբ արտաքին առևտրաշրջանառությունն աճել է երկու անգամ` հասնելով 18,4 մլրդ դոլարի: Ընդ որում, արտահանման ոլորտում աճը եղել է 2,3 անգամ` կազմելով 7,9 մլրդ դոլար, իսկ ներմուծման բնագավառում` 86%` հասնելով 10,4 մլրդ դոլարի: 

Հունիսին նախորդ տարվա նույն ամսվա համեմատ ՀՀ սպառողական շուկայում գնաճը կազմել է 0,8%, իսկ կիսամյակի կտրվածքով գրանցվել է 0,6% գնանկում: