ԱՄՆ-ն պայմաններ է ստեղծում, որ Հայաստանն ավելի հեռանա Ռուսաստանից․ Օ’Բրայեն
Civilnet
Եվրոպայի ու Եվրասիայի հարցերով ԱՄՆ փոխպետքարտուղար Ջեյմս Օ’Բրայենը հայտարարել է, որ Միացյալ Նահանգները պայմաններ է ստեղծում, որ Հայաստանն ավելի հեռանա Ռուսաստանից։
«Հայաստանը թեմա է, որին մենք շատ ժամանակ ենք հատկացնում: Մի քանի ամիս առաջ պետքարտուղար Բլինքենի և [Եվրահանձնաժողովի] նախագահ Ֆոն դեր Լայենի հետ հանդիպեցինք վարչապետ Փաշինյանի հետ, ստեղծեցինք նոր հարթակ՝ օգնելու Հայաստանին նվազեցնել կախվածությունը Ռուսաստանից: Հայաստանը տնտեսապես ու էներգետիկ առումով գրեթե ամբողջությամբ կախված է ՌԴ-ից։ Մենք պետք է դիվերսիֆիկացնենք այն՝ Փաշինյանի գլխավորությամբ հնարավոր դարձնելով կատարել այն խիզախ քայլերը, որոնք նրանց կհեռացնեն Ռուսաստանից: ՌԴ-ն երաշխավորել էր Հայաստանի անվտանգությունը 2020-ի պատերազմից հետո: [...] Եվ այն [անվտանգության ապահովումը] ձախողվեց, երբ Ադրբեջանը վերցրեց Լեռնային Ղարաբաղի շրջակա տարածքը: Դրանից հետո Հայաստանի բնակչության մեծ մասը ցանկանում է ավելի հեռանալ Ռուսաստանից: Հետևաբար, մենք ստեղծում ենք պայմաններ, որպեսզի դա տեղի ունենա»,- հուլիսի 30-ին Սենատի արտաքին հարաբերությունների հանձնաժողովում հայտարարել է Օ’Բրայենը։
Փոխպետքարտուղարը կարևոր քայլ է համարում այս շաբաթվա վերջում «Զվարթնոց» օդանավակայանից ռուս սահմանապահների հեռացումը․ «Դա իսկապես կարևոր է մի շարք պատճառներով։ Նախ, նրանք վերահսկում են միջազգային օդանավակայանը, և հենց այնտեղ է տեղի ունենում պատժամիջոցների շրջանցման մի մասը: Մենք կտեսնենք, թե արդյոք Ռուսաստանը հարգում է Հայաստանի ինքնիշխան ցանկությունը, որ հեռանա այդ տարածքից»։
Օ’Բրայենի խոսքով՝ Վաշինգտոնը շարունակում է ակտիվ նպաստել Հայաստանի և Ադրբեջանի միջև արդար և երկարատև խաղաղության հաստատմանը: Նա կարծում է, որ Երևանն ու Բաքուն հիասթափված են իրենց հարաբերությունների կարգավորման գործում Մոսկվայի ներգրավվածությունից։
«Մենք մեծ ջանքեր ենք գործադրում, որպեսզի խաղաղության ցանկությունը հստակ ամրագրվի համաձայնագրում: Ընդամենը մեկ բան կասեմ, թե ինչու է դա այդքան կարևոր: Նայե՛ք քարտեզին: Կենտրոնական Ասիայի երկրներն անհավանական հարուստ են, և այժմ համաշխարհային շուկաներ դուրս գալու նրանց միակ տարբերակը Ռուսաստանի կամ Չինաստանի միջոցով են։ Եթե մենք կարողանանք բացել մի երթուղի, որը կանցնի Հայաստանով և Ադրբեջանով, ապա նրանք շատ ավելի քիչ կախվածություն կունենան Ռուսաստանից ու Չինաստանից և ավելի մեծ մուտք կունենան համաշխարհային շուկաներ»,- ասել է նա։
Պատմություններ
