Ստեփանծմինդա-Լարս ճանապարհին ժամանակավոր սահմանափակումներ կմտցվեն

Վրաստանում Հայաստանի դեսպանությունը տեղեկացնում է, որ Ստեփանծմինդա-Լարս ճանապարհին սահմանափակումներ են մտցվում։ Մասնավորապես, երեք օր փակ է լինելու Դևդորակի թունելը, երթևեկությունը կազմակերպվելու է շրջանցիկ ճանապարհով։

«Մցխեթա-Ստեփանծմինդա-Լարս միջազգային նշանակության ավտոճանապարհի 132-135կմ հատվածում գտնվող Դևդորակ թունելում կանխարգելիչ աշխատանքներ իրականացնելու նպատակով, օգոստոսի 15-ին, 16-ին և 17-ին, ժամը 10:00-19:00 ընկած հատվածում սահմանափակվում է բոլոր տեսակի ավտոտրանսպորտային միջոցների երթևեկությունը։ Թունելի փակման ընթացքում ավտոմեքենաների երթևեկությունը կընթանա ներպետական նշանակության Դևդորակ թունելի շրջանցային ճանապարհով։ Տրանսպորտային միջոցների երթևեկությունը կընթանա ըստ ժամանակավոր կազմակերպված գրաֆիկի։ Նշված ռեժիմով տեղաշարժը կիրականացվի պարեկային ոստիկանության անմիջական վերահսկողությամբ և համակարգմամբ»,- ասված է հայտարարությունում։

Լարսի անցակետի ռուսական կողմում այժմ կուտակումներ են։ Վերջին տվյալներով դեռ 3 հազար բեռնատար խցանման մեջ է, որոնցից հազարը հայկական մեքենաներն են: Մոտ հինգ օր առաջ հերթում յոթ հազար բեռնատար կար։ Խցանումները պայմանավորված են զբոսաշրջիկների մեծ հոսքով, նրանք Ռուսաստանից Վրաստան են գնում։ Լարսը Հայաստանը Ռուսաստանին կապող ցամաքային միակ ճանապարհն է։