200 եվրոյի և միայն 10 կիլոգրամ․ անմաքս ներկրումների փոփոխությունն ուժի մեջ կմտնի օգոստոսի 19-ից

Ցամաքային սահմանով անմաքս ներկրումների սահմանաչափի նվազման փոփոխությունն ուժի մեջ կմտնի օգոստոսի 19-ից, հայտնում է Պետական եկամուտների կոմիտեն։

«Ֆիզիկական անձանց կողմից ԵԱՏՄ անդամ չհանդիսացող պետություններից ցամաքային տրանսպորտով կամ հետիոտնային եղանակով, ուղեկցվող կամ չուղեկցվող ուղեբեռով ՀՀ տեղափոխվող անձնական օգտագործման ապրանքների՝ առանց մաքսատուրքի և հարկերի վճարման ներմուծման չափաքանակների արտոնության շեմը նվազեցվել է։ Օգոստոսի 19-ից ցամաքային տրանսպորտով և հետիոտնային եղանակով առանց մաքսատուրքերի, հարկերի վճարման ՀՀ կարող են տեղափոխվել 200 եվրոյին համարժեք դրամը և (կամ) 10 կիլոգրամը չգերազանցող անձնական օգտագործման ապրանքներ»,- ասված է հաղորդագրությունում։

Նախկին կարգավորման համաձայն՝ անձնական օգտագործման ապրանքներն առանց մաքսատուրքի ներմուծվում էին, եթե դրանց արժեքը չէր գերազանցում 500 եվրոն, իսկ քաշը՝ 25 կիլոգրամը։

Կառավարությունը որպես սահմանաչափի նվազման փոփոխության հիմնավորում է նշում ստվերի դեմ պայքարը․ «Ցամաքային եղանակով ներմուծվող անձնական օգտագործման ապրանքների մասով առկա են չարաշահման հնարավորություններ։ Մասնավորապես` ցամաքային անցման կետերով միևնույն ֆիզիկական անձի կողմից պարբերաբար սահմանահատման արդյունքում ՀՀ տարածք են ներմուծվում մինչև 500 եվրո արժեքով և մինչև 25 կգ քաշով ապրանքներ` իբրև անձնական օգտագործման, սակայն իրականում այդ ապրանքները տարբեր ճանապարհներով վաճառքի նպատակով հայտնվում են ներքին շուկայում` դրանով իսկ խաթարելով մրցակցային դաշտը և ստեղծելով ստվերային շրջանառություն»։

Չարաշահումների հետ կապված հիմնական դեպքերն առնչվում են հետևյալ ապրանքներին՝ հագուստ, կոշիկ, ավտոպահեստամասեր, քսայուղեր, լվացքի փոշի և սանիտարահիգիենիկ պարագաներ (տակդիրներ և այլն), Վրաստանի անմաքս առևտրի խանութներից ձեռքբերված ալկոհոլային խմիչքներ և ծխախոտ։