Միրզոյանը Իրանի նորանշանակ արտգործնախարարի հետ քննարկել է առաջիկա ծրագրերը

Արտաքին գործերի նախարար Արարատ Միրզոյանը հեռախոսազրույց է ունեցել Իրանի արտաքին գործերի նորանշանակ նախարար Սեյեդ Աբբաս Արաղչիի հետ, հայտնում է Հայաստանի ԱԳՆ-ը։

Միրզոյանը շնորհավորել է Արաղչիին ԱԳ նախարարի պաշտոնում նշանակվելու կապակցությամբ:

«Քննարկել են Հայաստանի և Իրանի միջև երկկողմ հարաբերությունների օրակարգին առնչվող հարցեր՝ ընդգծելով բարեկամական կապերի, փոխադարձ հետաքրքրություն ներկայացնող ոլորտներում ամուր գործընկերության հետագա ամրապնդման ուղղությամբ շարունակական ջանքեր գործադրելու երկուստեք պատրաստակամությունը: Անդրադարձ է կատարվել առաջիկա ծրագրերին: Արարատ Միրզոյանը նշել է, որ հայկական կողմը բարձր է գնահատում ՀՀ ինքնիշխանության և տարածքային ամբողջականության անխախտելիության առնչությամբ Իրանի հաստատուն դիրքորոշումը»,- ասված է հաղորդագրությունում։

Մայիսին Իրանի նախագահ Էբրահիմ Ռայիսին և արտգործնախարար Հոսեյն Աբդոլահիանը զոհվել էին ավիավթարի հետևանքով։ Դրանից հետո Իրանում կայացած ընտրությունների արդյունքներով նախագահ է ընտրվել բարեփոխական թևի ներկայացուցիչ Մասուդ Փեզեշքիանը։ Վերջինս ԱԳՆ ղեկավարի պաշտոնում առաջադրել է Սեյեդ Աբբաս Արաղչիի թեկնածությունը, որը օգոստոսի 20-ին հաստատվել է խորհրդարանի կողմից։

https://civilnet.am/news/792669/%d5%ab%d6%80%d5%a1%d5%b6%d5%a8-%d5%af%d5%b8%d5%b2%d5%b4-%d5%a7-%d5%a1%d5%ba%d5%a1%d5%b7%d6%80%d5%bb%d5%a1%d6%83%d5%a1%d5%af%d5%b4%d5%a1%d5%b6%d5%a8-%d5%a2%d5%a1%d5%b5%d6%81-%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%ab-%d5%ab%d5%b6%d6%84%d5%b6%d5%ab%d5%b7%d5%ad%d5%a1%d5%b6%d5%b8%d6%82%d5%a9%d5%b5%d5%a1%d5%b6-%d5%b6%d5%a5%d6%80%d6%84%d5%b8%e2%80%a4-%d5%bd%d5%b8%d5%a2%d5%b0%d5%a1%d5%b6%d5%ab/