Civilnet
Վերջին տարիների ընթացքում առաջին անգամ Թուրքիայի նախագահ Ռեջեփ Թայիփ Էրդողանը ՄԱԿ-ի Գլխավոր վեհաժողովում սեպտեմբերի 25-ին իր ելույթում շրջանցել է Քաշմիրի հիշատակումը, գրում է հնդկական անգլալեզու Wionews.com կայքը։ Հոդվածի հեղինակ Սիդհանտ Սիբալը նշում է, որ 2019-ից ի վեր, երբ Հնդկաստանը վերացրեց նախկին Ջամու և Քաշմիր նահանգի հատուկ կարգավիճակը` այն բաժանելով առանձին վարչական տարածքների, Էրդողանը մշտապես այս կամ այն ձևով նշել է Քաշմիրի մասին։
2023-ին նա կոչ արեց «Քաշմիրում արդար և կայուն խաղաղություն հաստատել Հնդկաստանի և Պակիստանի միջև երկխոսության և համագործակցության միջոցով»։ 2022-ին էլ նա արեց նույն արտահայտությունը և ափսոսանք հայտնեց, որ «Հնդկաստանի և Պակիստանի միջև ամուր խաղաղություն և համագործակցություն դեռևս չի հաստատվել՝ չնայած նրանց անկախությունից անցել է 75 տարի»:
2021-ին նա կոչ արեց Քաշմիրի խնդիրը լուծել ՄԱԿ-ի բանաձևերով, մի բան, որ նա ասել էր նաև 2020-ին։ Էրդողանն ամենաբարձրագոչ հայտարարությունն արեց 2019-ին, երբ ասաց, որ «վեճը պետք է լուծվի երկխոսության միջոցով՝ արդարության, այլ ոչ թե հակամարտության հիման վրա»:
Ակնկալվում է, որ Քաշմիրի մասին Էրդողանի հռետորաբանության փոփոխությունը ուղի կհարթի Հնդկաստանի և Թուրքիայի միջև դրական կապերի համար։ Այս ամենը տեղի է ունենում Թուրքիայի՝ BRICS-ին անդամակցության հայտի կոնտեքստում: BRICS-ին միանալը Թուրքիայի համար տնտեսական նոր հնարավորություններ կարող է բացել, այդ թվում՝ ընդլայնված առևտրային հարաբերություններ, ներդրումներ BRICS երկրներից և մասնակցություն այլընտրանքային ֆինանսական մեխանիզմների, ինչպիսին է BRICS-ի Նոր զարգացման բանկից (New Development Bank): Հնդկաստանը BRICS խմբի հիմնադիր անդամներից է։
ՄԱԿ-ի Գլխավոր վեհաժողովում Էրդողանը նշել է, որ Թուրքիան վճռական է զարգացնելու հարաբերությունները BRICS-ի հետ, որը միավորում է զարգացող տնտեսությունները։ Նա ասել է, որ իր երկիրը «խորացնում է ներգրավվածությունը տարածաշրջանային կազմակերպությունների հետ, ինչպիսին է Հնդկական օվկիանոսի երկրների ասոցիացիան (Indian Ocean Rim Association, IORA), Խաղաղօվկիանոսյան կղզիների ֆորումը և մասնավորապես ASEAN-ը: Հնդկաստանը նաև IORA-ի հիմնադիր անդամ է:
Պատմություններ
