ԱԳՆ-ն դատապարտել է Լիբանանում ՄԱԿ-ի ուժերի կենտրոնակայանի վրա Իսրայելի հարձակումը

Հայաստանի արտաքին գործերի նախարարությունը դատապարտել է Լիբանանում ՄԱԿ-ի ժամանակավոր ուժերի կենտրոնակայանի վրա Իսրայելի հարձակումը: Այս մասին ասված է Հայաստանի արտգործնախարարության X-ի էջում։ 

«Որպես Լիբանանում ՄԱԿ-ի ժամանակավոր ուժերում մասնակցություն ունեցող երկիր՝ Հայաստանը խստորեն դատապարտում է կենտրոնակայանի վրա հարձակումը: ՄԱԿ-ի ժամանակավոր ուժերը կոչված են ամրապնդելու կայունությունը՝ համաձայն ՄԱԿ-ի Անվտանգության խորհրդի համապատասխան բանաձևերի»,- նշված է ԱԳՆ գրառման մեջ։

Armenia as a contributing country to @UNIFIL_, firmly denounces the targeting of the headquarters of #UNIFIL, entrusted to foster stability in accordance with relevant @UN Security Council resolutions.

— MFA of Armenia?? (@MFAofArmenia) October 11, 2024

Ավելի վաղ հայտնի էր դարձել, որ Լիբանանի Նաքուրա քաղաքում ՄԱԿ-ի ժամանակավոր ուժերի (UNIFIL) խաղաղապահների դիրքերը հոկտեմբերի 11-ին հարձակման են ենթարկվել իսրայելական ուժերի կողմից, որի հետևանքով 2 խաղաղապահ է վիրավորվել։

Գիշերը Իսրայելը հարվածներ է հասցրել նաև Բեյրութին՝ թիրախավորելով «Հեզբոլլահ»-ի բարձրաստիճան ներկայացուցիչ Վաֆիկ Սաֆային։ Իսրայելական հարվածից Լիբանանի մայրաքաղաքում զոհվել է 22 մարդ, վիրավորվել՝ 117-ը։