Մոլդովացիների 50,31%-ը կողմ է քվեարկել ԵՄ անդամակցության մասին դրույթին

Մոլդովայի նախագահ Մայա Սանդուն հայտարարել է, որ կիրակի օրը երկրում անցկացված երկակի քվեարկություններում (նախագահի ընտրություն և ԵՄ անդամակցության հանրաքվե) եղել է արտաքին «աննախադեպ» միջամտություն, երբ նախնական արդյունքները ցույց տվեցին, որ ընտրությունները գնում են դեպի սերտ երկրորդ փուլ, իսկ ԵՄ հանրաքվեն հասել է վերջնագծին, հաղորդում է Reuters-ը։

Նախագահական ընտրություններում Սանդուն ստացել է ձայների 38%-ը, իսկ նրա գլխավոր մրցակիցը՝ նախկին գլխավոր դատախազ Ալեքսանդր Ստոյանոգլոն՝ 28%-ը, ինչը նշանակում է երկրորդ փուլ, որը կանցկացվի նոյեմբերի 3-ին:

Ձայների ավելի քան 99%-ի հաշվարկից հետո հանրաքվեում մոլդովացիների 50,31%-ը քվեարկել է «այո», իսկ 49,69%-ը՝ «ոչ» ԵՄ անդամակցությանը: Հանրաքվեն նպատակ ուներ որոշել՝ արդյոք սահմանադրության մեջ ներառել դրույթ, որը ԵՄ անդամակցությունը սահմանում է որպես նպատակ: Արևմտամետ գործող նախագահը ցանկանում է, որ Մոլդովան մինչև 2030-ը միանա ԵՄ-ին:

Մոլդովացիներին հղած ուղերձում Սանդուն ասել է, թե կան «հստակ ապացույցներ», որ քրեական խմբավորումները, համագործակցելով Մոլդովայի շահերին թշնամաբար տրամադրված արտաքին ուժերի հետ, փորձել են գնել 300,000 ձայն, ինչը նա անվանել է «աննախադեպ մասշտաբի խարդախություն»:

«Նրանց նպատակն էր խաթարել ժողովրդավարական գործընթացը: Նրանց մտադրությունն էր հասարակության մեջ վախ և խուճապ տարածել... Մենք սպասում ենք վերջնական արդյունքներին, և կպատասխանենք վճռական որոշումներով», - ասել է նա:

Քվեարկությունից առաջ մի շարք մեղադրանքներ են հնչել Ռուսաստանում բնակվող և փախուստի դիմած մագնատ Իլան Շորի հասցեին՝ ընտրություններին միջամտության վերաբերյալ: Մոսկվան հերքում է միջամտությունը։ Շորը ևս հերքում է իրեն մեղսագրվող արարքները:

Այս ամսվա սկզբին Մոլդովայի ոստիկանությունը Շորի դեմ մեղադրանք էր առաջադրել, և նա հեռակա դատապարտվել է խարդախության և գողության համար՝ առնվազն 130,000 ընտրողների կաշառելու փորձի մեջ՝ «ոչ» քվեարկելու և ընտրություններում «մեր թեկնածուին» աջակցելու համար:

Շորը սոցիալական ցանցերում բացահայտ առաջարկել է վճարել մոլդովացիներին՝ մյուսներին համոզելու որոշակի քվեարկելու, և ասել է, որ դա իր վաստակած գումարի օրինական օգտագործում է:

Երկուշաբթի վաղ առավոտյան նա ասել է, որ մոլդովացիները քվեարկել են հանրաքվեի դեմ։ «Այսօր շնորհավորում եմ ձեզ, դուք պարտվեցիք ճակատամարտում»,- դիմելով Սանդուին՝ ասել է նա:

Քվեարկությունից առաջ Մոլդովայի իշխանությունները փակել էին առցանց ռեսուրսներ, որոնք, ըստ նրանց, ապատեղեկատվություն էին տարածում։ Իշխանությունները հայտարարել էին, թե բացահայտել են Ռուսաստանում մոլդովացիներին զանգվածային անկարգություններ կազմակերպելու վերապատրաստման մի պլան և քրեական գործեր էին հարուցել Շորի կողմնակիցների դեմ:

Գորշ գոտի

Ռումինիայով և այժմ պատերազմից բզկտված Ուկրաինայով շրջապատված Մոլդովան 1991-ին Խորհրդային Միության փլուզումից հետո տատանվել է արևմտյան և ռուսական ուղղությունների միջև:

Մոսկվայի հետ հարաբերությունները վատթարացել են Սանդուի օրոք, որը պաշտպանում է ԵՄ անդամակցությունը: Նրա կառավարությունը դատապարտել է Ռուսաստանի ներխուժումը Ուկրաինա, մեղադրել Ռուսաստանին իրեն տապալելու դավադրության մեջ և բազմազանեցրել էներգետիկ ներկրումները Ռուսաստանի կողմից գազի մատակարարումը սահմանափակելուց հետո: Ռուսաստանը Սանդուի կառավարությանը մեղադրել է ռուսատյացության մեջ:

Հարցումները ցույց էին տվել, որ մոլդովացիների ակնհայտ մեծամասնությունը քվեարկությունից առաջ աջակցում էր Եվրոպական միությանը անդամակցելուն:

Թեկնածուներից առնվազն հինգը կոչ էին արել իրենց աջակիցներին կա՛մ բոյկոտել հանրաքվեն, կա՛մ քվեարկել «ոչ»՝ պնդելով, որ հանրաքվեն խորամանկություն է՝ Սանդուի ձայները ընտրություններում ավելացնելու համար:

Ստոյանոգլոն, որի թեկնածությանն աջակցում էին ավանդաբար ռուսամետ Սոցիալիստների կուսակցությունը, բոյկոտել էր հանրաքվեն՝ ասելով, որ երկրին նոր կառավարություն է հարկավոր, և որ եթե ինքը հաղթի, կզարգացնի կապերը ԵՄ-ի, Ռուսաստանի, ԱՄՆ-ի և Չինաստանի հետ:

Սանդուի PAS կուսակցության պատգամավոր Օազու Նանտոյը սպասվածից թույլ արդյունքը վերագրել է «ռուսական հիբրիդային միջամտությանը»:

«Մենք գորշ գոտում ենք և Պուտինի մեծ ազդեցության տակ»,- ասել է նա: