Թրամփը խոսել է «120,000 հայ քրիստոնյաների սարսափելի հալածանքների և բռնի տեղահանման մասին Արցախում»

ԱՄՆ նախկին նախագահ և ներկայում ԱՄՆ նախագահի թեկնածու Դոնալդ Թրամփը Թվիթերի իր էջում գրառում է արել 2023-ի Արցախի էթնիկ զտման մասին՝ մեղադրանք հնչեցնելով նախագահական ընտրություններում իր մրցակից և ԱՄՆ գործող փոխնախագահ Քամալա Հարիսի նկատմամբ։

«Քամալա Հարիսը ՈՉԻՆՉ չարեց, երբ 120,000 հայ քրիստոնյաներ սարսափելի հալածանքների էին ենթարկվում և բռնի տեղահանվում Արցախում: Աշխարհի քրիստոնյաները ապահով չեն լինի, եթե Քամալա Հարիսը լինի Միացյալ Նահանգների նախագահ: Երբ ես նախագահ լինեմ, ես կպաշտպանեմ հալածվող քրիստոնյաներին, կաշխատեմ դադարեցնել բռնությունն ու էթնիկ զտումները, և մենք կվերականգնենք խաղաղությունը Հայաստանի և Ադրբեջանի միջև»։

Դոնալդ Թրամփը ԱՄՆ նախագահն էր 2020-ի Ղարաբաղյան պատերազմի ժամանակ։ Այդ ժամանակ նա մասնակցում էր նախագահական ընտրությունների ընդդեմ այսօրվա գործող նախագահ Ջոզեֆ Բայդենի։ 2020-ի ընտրարշավին Թրամփի հայտարարությունը, ինչպես նաև 2020-ի հոկտեմբերի 23-ին Վաշինգտոնում ԱՄՆ պետքարտուղար Մայք Պոմպեոյի առանձին հանդիպումները Հայաստանի և Ադրբեջանի արտգործնախարարներ Զոհրաբ Մնացականյանի և Ջեյհուն Բայրամովի հետ արդյունք չտվեցին և չնպաստեցին հրադադարի հաստատմանը։