Փաշինյանը շնորհավորել է Կոբախիձեին ընտրություններում «տպավորիչ հաղթանակի» առիթով

Վարչապետ Նիկոլ Փաշինյանը շնորհավորական ուղերձ է հղել Վրաստանի վարչապետ Իրակլի Կոբախիձեին Վրաստանի խորհրդարանական ընտրություններում «Վրացական երազանք» կուսակցության հաղթանակի առիթով:

«Ջերմորեն շնորհավորում եմ Վրաստանի խորհրդարանական ընտրություններում «Վրացական երազանք» կուսակցության տպավորիչ հաղթանակի կապակցությամբ: Վրաստանի հետ հարաբերությունների շարունակական զարգացումը Հայաստանի կառավարության արտաքին քաղաքական առաջնահերթություններից է։ Լիահույս եմ, որ Վրաստանում Ձեր առաջնորդության առաջիկա տարիների ընթացքում և մեր համատեղ ջանքերի շնորհիվ անշեղորեն կզարգանա ու կընդլայնվի Հայաստանի և Վրաստանի փոխգործակցությունը։ Մեր երկրների միջև հաստատված ռազմավարական գործընկերությունը շոշափելի հնարավորություններ է ստեղծում ընդհանուր մարտահրավերներին համատեղ դիմակայելու և մեր տարածաշրջանն ավելի կայուն, անվտանգ ու բարգավաճ դարձնելու համար»,- ասված է Փաշինյանի ուղերձում։

Վրաստանում հոկտեմբերի 26-ին անցկացված խորհրդարանական ընտրություններում ամենաշատ ձայնը ստացել է իշխող «Վրացական երազանք» կուսակցությունը՝ 54 տոկոս։ Խորհրդարան անցնելու շեմը հաղթահարել է ևս չորս քաղաքական ուժ․ փոփոխությունների կոալիցիայի օգտին քվեարկել է ընտրողների 11%-ը, Միասնություն – Ազգային շարժման օգտին՝ 10%-ը, Հզոր Վրաստան ստացել է 9% ձայն, Հանուն Վրաստանի քաղաքական ուժը՝ 8%։ Ընդդիմադիր ուժերից երեքը հայտարարել են, որ չեն ընդունում ընտրությունների արդյունքները։

https://civilnet.am/news/802812/%d5%be%d6%80%d5%a1%d5%bd%d5%bf%d5%a1%d5%b6%d5%b8%d6%82%d5%b4-%d5%a4%d5%ab%d5%bf%d5%b8%d6%80%d5%a4%d5%a1%d5%af%d5%a1%d5%b6-%d5%ad%d5%b8%d6%82%d5%b4%d5%a2%d5%a8-%d5%af%d5%b8%d5%b9-%d5%a7-%d5%a1%d5%b6%d5%b8%d6%82%d5%b4-%d5%a1%d5%b6%d5%be%d5%a1%d5%be%d5%a5%d6%80-%d5%b3%d5%a1%d5%b6%d5%a1%d5%b9%d5%a5%d5%ac-%d6%84%d5%be%d5%a5%d5%a1%d6%80%d5%af%d5%b8%d6%82%d5%a9%d5%b5%d5%b8%d6%82%d5%b6%d5%a8/