Civilnet
Քննչական կոմիտեի նախագահ Արգիշտի Քյարամյանը ուղերձ է հղել՝ տեղեկացնելով, որ հեռանում է պաշտոնից։
«Եկել է պահը հայտնելու ձեզ՝ Հայաստանի Հանրապետության քննչական կոմիտեի նախագահի պաշտոնից հրաժարվելու՝ իմ կայացրած որոշման մասին։ Այն բխում է վերջին շրջանում ընդհանուր իրավապահ համակարգի գործունեության շուրջ ստեղծված իրավիճակից ածանցվող ներքին վերագնահատումներից։ Քննչական կոմիտեի նախագահի պաշտոնից հեռանում եմ նույնպիսի ներքին հպարտությամբ ու ներդաշնակությամբ, ինչպես ստանձնել եմ այն ու աշխատել»,- ասված է ուղեձում։
Քյարամյանը շնորհակալություն է հայտնում վարչապետին և կառավարությանը՝ պատասխանատու պաշտոնն իրեն վստահելու համար։
«Վստահ եմ, որ Հայաստանում շարունակվող դատաիրավական, իրավապահ մարմինների բարեփոխումները, ՀՀ քննչական կոմիտեի հետագա զարգացման ուղեցույցը լինելու է շարունակական, և մենք ունենալու ենք մեր պատկերացրած նախաքննական մարմինը»,- գրել է նա։
Աշխատանքից ազատման մասին ավելի վաղ հայտնել էին Բարձրագույն դատական խորհրդի նախագահ Կարեն Անդրեասյանը, Հակակոռուպցիոն կոմիտեի նախագահ Սասուն Խաչատրյանը և ներքին գործերի նախարար Վահե Ղազարյանը։
Տելեգրամյան ալիքներում և լրատվամիջոցներում շրջանառվող տեղեկությունների համաձայն՝ հրաժարականի դիմումներ են ներկայացրել նաև տարածքային կառավարման և ենթակառուցվածքների նախարար Գնել Սանոսյանը և Պետեկամուտների կոմիտեի նախագահ Ռուստամ Բադասյանը։
Կառավարության վերջին՝ նոյեմբերի 15-ի նիստին վարչապետ Նիկոլ Փաշինյանը հայտարարել էր, որ իրավապահ համակարգից կոնկրետ արդյունքներ է պահանջում։ «Դատական, իրավապահ, ուժային կառույցների հարգելի ներկայացուցիչներ, իմ համբերության բաժակը լցվել է»,- ասել էր Փաշինյանը։
https://civilnet.am/news/805883/%d5%b4%d5%ab-%d5%b7%d5%a1%d6%80%d6%84-%d5%a2%d5%a1%d6%80%d5%b1%d6%80%d5%a1%d5%bd%d5%bf%d5%ab%d5%b3%d5%a1%d5%b6-%d5%ba%d5%a1%d5%b7%d5%bf%d5%b8%d5%b6%d5%b5%d5%a1%d5%b6%d5%a5%d6%80%d5%ab-%d5%ad%d5%b6%d5%a4%d6%80%d5%a5%d5%ac-%d5%a5%d5%b4-%d5%a9%d5%b8%d5%b2%d5%b6%d5%a5%d5%ac-%d5%a6%d5%a2%d5%a1%d5%b2%d5%a5%d6%81%d6%80%d5%a1%d5%ae-%d5%ba%d5%a1%d5%b7%d5%bf%d5%b8%d5%b6%d5%b6%d5%a5%d6%80%d5%a8-%d6%83%d5%a1%d5%b7%d5%ab%d5%b6%d5%b5%d5%a1%d5%b6/
Պատմություններ
