Շարունակելու եմ պայքարել հայ գերիների ազատ արձակման համար՝ չնայած Բաքվի ճնշումներին. Ֆրենկ Փալոն

Ամերիկացի կոնգրեսական Ֆրենկ Փալոնը հայտարարել է, որ շարունակելու է պայքարել ՀՀ տարածքային ամբողջականության և հայ գերիների ազատ արձակման համար՝ չնայած Բաքվի ճնշումներին։

«Չնայած Ալիևի կազմակերպած բողոքի ցույցերին՝ խոչընդոտելու իմ մասնակցությունը COP29-ին, ես շարունակելու եմ պայքարել Հայաստանի տարածքային ամբողջականության, հայ գերիների ազատ արձակման և խաղաղության համաձայնագրի համար»,- X-ի իր էջում գրել է Փալոնը։

Despite Aliyev organizing violent protests to prevent me, @SenMarkey & others from participating in #COP29, I'll continue to fight for Armenia's territorial sovereignty, the release of Armenian prisoners & a peace deal that brings calm to the region.https://t.co/2G1d0RVyE8

— Rep. Frank Pallone (@FrankPallone) November 18, 2024

Կոնգրեսական Ֆրենկ Փալոնը կիրակի ընդհատել է Բաքու այցը և մեկնել է ԱՄՆ: Փալոնը ժամանել էր Ադրբեջան՝ մասնակցելու COP29 համաժողովին: Նոյեմբերի 16-ին Ադրբեջանի նախագահ Իլհամ Ալիևն ընդունել էր ամերիկացի կոնգրեսականներին, սակայն Փալոնին, ըստ ադրբեջանական «Թուրան» գործակալության՝ թույլ չեն տվել մասնակցել հանդիպմանը: Նոյեմբերի 17-ին էլ ադրբեջանական կառավարամետ հասարակական կազմակերպությունները բողոքի ցույց են անցկացրել հյուրանոցի առջև, որտեղ իջևանել էր կոնգրեսականը՝ պահանջելով նրան պատասխանատվության ենթարկել «հակաադրբեջանական» գործունեության համար:

Ֆրենկ Փալոնը ԱՄՆ Կոնգրեսի հայկական հարցերով հանձնախմբի հիմնադիրն է։ Նախորդ տարիներին նա այցելել է նաև Արցախ, ինչպես նաև հեղինակել է Ադրբեջանի դեմ պատժամիջոցների մի շարք օրենսդրական նախագծեր։