Միրզոյանը գերմանացի պաշտոնակցի հետ քննարկել է հայ-ադրբեջանական կարգավորումը
Civilnet
Արտաքին գործերի նախարար Արարատ Միրզոյանը նոյեմբերի 19-ին Երևանում ընդունել է գերմանացի պաշտոնակից Անալենա Բերբոքին։
«Տիկին նախարար, հարգելի՛ գործընկերներ, ողջունում եմ ձեզ Երևանում: Միշտ ուրախ եմ Ձեզ տեսնել՝ քննարկելու համաշխարհային օրակարգին և մեր տարածաշրջանին առնչվող հարցերը, ինչպես նաև մեր հարաբերությունները Գերմանիայի հետ, Հայաստան-ԵՄ գործընկերությունը և մեր հարաբերությունների խորացումը: Կան բազմաթիվ գործիքներ, մեխանիզմներ և փաստաթղթեր, որոնք քննարկվում ենք՝ ՀՀ-ԵՄ հարաբերությունների մասով, և այստեղ ձեր ներդրումը շատ կարևոր է»,- ասել է Միրզոյանը։
Հայաստանի և Գերմանիայի արտգործնախարարները մտքեր են փոխանակել տարածաշրջանային հարցերի շուրջ, անդրադարձել հայ-ադրբեջանական հարաբերությունների կարգավորման գործընթացին:
«Նախարար Միրզոյանը ներկայացրել է գործընթացում վերջին զարգացումները, այդ թվում՝ Հայաստան-Ադրբեջան խաղաղության պայմանագրի նախագծի վերջնականացման ուղղությամբ իրականացված աշխատանքները՝ ընդգծելով պայմանագրի ստորագրման կարևորությունը: Հայաստանի արտաքին քաղաքական գերատեսչության ղեկավարը շեշտել է ՀՀ կառուցողական մոտեցումը տարածաշրջանային հաղորդակցությունների ապաշրջափակման հարցում՝ որպես խաղաղության օրակարգի, ինչպես նաև ավելի լայն աշխարհագրությամբ տնտեսական փոխկապակցվածության խթանման կարևոր բաղադրիչ»,- ասված է ԱԳՆ հաղորդագրությունում։
Արարատ Միրզոյանն ու Անալենա Բերբոքը քննարկել են նաև ՀՀ-ԵՄ գործընկերության օրակարգի հարցերի լայն շրջանակ՝ անդրադառնալով վերջին ժամանակահատվածում արձանագրված ձեռքբերումներին, ընթացիկ ծրագրերին, ինչպես նաև համագործակցության խորացման հեռանկարներին: Նախարարներն անդրադարձել են նաև երկկողմ գործընկերության հետագա ընդլայնման հնարավորություններին։
Պատմություններ
