Հունաստանը ծրագրում է ՀՕՊ համակարգեր փոխանցել Հայաստանին. հունական աղբյուր

Հունաստանը կարող է Հայաստանին փոխանցել S-300PMU-1 զենիթահրթիռային համալիրներ և ռուսական արտադրության այլ հակաօդային պաշտպանության (ՀՕՊ) համակարգեր։ Այս մասին հայտնում է հունական Enikos.gr լրատվական կայքը՝ հղում անելով Հունաստանի զինված ուժերի գլխավոր շտաբի անանուն աղբյուրներին։

Ըստ լրատվամիջոցի՝ խոսքը S-300PMU-1, TOR M-1 և OSA-AK ՀՕՊ համալիրների մասին է, որոնք Հունաստանը ծրագրում է փոխարինել իսրայելական նորագույն ՀՕՊ համակարգերով։ Լրատվամիջոցի փոխանցմամբ, Հայաստանին այս համակարգերի փոխանցումը հնարավոր կլինի միայն այն բանից հետո, երբ Հունաստանը ավարտի «Երկաթե գմբեթ» ծրագիրը Էգեյան ծովի տարածաշրջանում՝ 2026-ի վերջին։

Ըստ հունական լրատվամիջոցի՝ սա բացառապես հունական նախաձեռնություն չէ, այլ Ֆրանսիայի հետ համագործակցության արդյունք։ Փարիզը նույնպես պատրաստվում է մասնակցել Հայաստանի զինման գործընթացին։

Ավելի վաղ՝ նոյեմբերի 23-ին, նմանատիպ տեղեկություն էր հրապարակել նաև Real News շաբաթաթերթը, որը փոխկապակցված է Enikos.gr կայքի հետ։ Աղբյուրները հավաստիացնում են, որ զինատեսակները, որոնք Հունաստանը պատրաստ է փոխանցել ոչ անվճար հիմունքներով, «չեն հեռացվի առանց փոխարինման» [խմբ․ սպառազինությունից]։

Այս տեղեկությունները դեռ պաշտոնապես չեն հաստատվել Հունաստանի կամ Հայաստանի պետական մարմինների կողմից։ 

Հունական աղբյուրները նշում են, որ վերջին տարիներին նկատելիորեն ընդլայնվել է Հայ-հունական ռազմական համագործակցությունը և նշում, որ հունական ռազմական բուհերում սովորող հայ կուրսանտների թիվը կրկնապատկվել է։

Վերջերս Հունաստանում անցկացված «Olympic Cooperation 24» զորավարժությունների ընթացքում մասնակցել էին նաև Հայաստանի ԶՈՒ ստորաբաժանումները։ Ըստ լրատվամիջոցի՝ Հայաստանի հետ ռազմական համագործակցության ընդլայնումը Հունաստանի համար «վերջին պահի որոշում չէ», այլ վերջին տարիներին հետևողականորեն իրականացվող քաղաքականություն:

Հավանական փոխանցման ենթակա համակարգերի մասին

Հայաստանն ունի ռուսական արտադրության S-300, TOR-M1 և OSA-AK համակարգեր, որոնք կիրառվել են 2020-ի Արցախյան պատերազմի ընթացքում։ Հայաստանի զինանոցում առկա են S-300PT և S-300PS մոդիֆիկացիաները։ Հունաստանի սպառազինությունում առկա S-300PMU-1 մոդիֆիկացիան գերազանցում է Հայաստանի ունեցած հակաօդային պաշտպանության միջոցները` մարտավարատեխնիկական բնութագրերով։

S-300PMU-1-ը մեծ հեռահարության ՀՕՊ համակարգ է, որը նախատեսված է ռազմավարական նշանակության օբյեկտների պաշտպանության համար և կարող է խոցել ինքնաթիռներ և հրթիռներ 70-100 կմ հեռավորության վրա։ TOR-M1-ը նախատեսված է ցածր բարձրության թռիչքներ իրականացնող թիրախների, հատկապես անօդաչուների խոցման համար, իսկ OSA-AK-ն՝ կարճ հեռահարության (մինչև 10 կմ) նշանակետերի խոցման համար։

Հունաստանի կողմից նմանատիպ համակարգերի հնարավոր փոխանցումը կարող է էականորեն ամրապնդել Հայաստանի ՀՕՊ ներուժը` հաշվի առնելով, որ հայկական կողմն արդեն ունի այս համակարգերի շահագործման փորձ։