ԱԺ նախագահ Հովիկ Աբրահամյանն այսօր հապճեպ մամուլի ասուլիս էր հրավիրել, որի հիմնական ասելիքը եղել է այն, որ ինքը երկրորդ նախագահ Ռոբերտ Քոչարյանին պատահաբար հանդիպել է ինքնաթիռում և նրա հետ քաղաքական հարցեր չի քննարկել: Ճիշտ է՝ ասուլիս հրավիրելու ֆորմալ առիթը եղել է Չեխիա կատարած այցելության արդյունքները ներկայացնելը, սակայն տարօրինակ պատահականությամբ լրատվամիջոցների գերակշիռ մեծամասնությունը չի անդրադարձել Հովիկ Աբրահամյանի չեխական այցին: Փոխարենը, բոլոր լրատվամիջոցները ասուլիսի «մեխն» են դարձրել Աբրահամյանի ինքնաթիռային հանդիպումը: Աբրահամյանը ասելիք է ունեցել ոչ թե Չեխիայից, այլ բոլորովին այլ թեմայով: Նախ՝ այսօր օրվա երկրորդ կեսին արդեն հայտնի էր, որ Աբրահամյանը ասուլիս է տալու՝ առանց թեման հստակեցնելու: Ասուլիսի մասին հաղորդագրությունից ժամեր անց լրատվամիջոցներից մեկը արտահոսք տվեց, թե ում է հանդիպել Հովիկ Աբրահամյանը Չեխիայից վերադառնալիս:
Այս ամենը բնականաբար արվում է այն նպատակով, որ Աբրահամյանը հնարավորություն ունենա ասուլիսի ժամանակ խոսել այդ մասին և «ազնվորեն» խոստովանել, որ երկրորդ նախագահի հետ ներքաղաքական հարցեր չեն քննարկվել:
Հայաստանում, որտեղ իշխանությունների առաջ լրջագույն խնդիրներ կան ծառացած, որտեղ երկիրը տարեկան լքում է շուրջ 40 հազար մարդ, հանրապետության երկրորդ դեմքը հրատապ հանդիպում է լրագրողներին, իրականում որպեսզի ընդամենը ասի՝ հանդիպել է Քոչարյանի հետ:
Պետականության կորստի մասին խոսելիս, կարծես թե այն իրականություն դառնալուց բավականին հեռու է թվում: Սակայն պետական համակարգի դեգրադացման և անկման շրջանը սկսվում է այն ժամանակ, երբ իշխանական էլիտայի մոտ բացակայում է պետական մտածելակերպ կոչվածը և պետական շահի գիտակցումը:
Պատմություններ
