Ահմադիանն առաջարկել է Իրանի միջնորդությունը «տարածաշրջանային երկրների միջև հարաբերություններում»

Հունվարի 9-ին Հայաստանի Անվտանգության խորհրդի քարտուղար Արմեն Գրիգորյանը ընդունել է Իրանի Ազգային անվտանգության բարձրագույն խորհրդի քարտուղար Ալի Աքբար Ահմադիանին։

Ըստ հայկական կողմի տարածած հաղորդագրության՝ զրուցակիցներն անդրադարձել են տարածաշրջանային և երկկողմ գործընթացներին։ Ահմադիանը նշել է, որ երկկողմ հարաբերություններն ունեն ամուր հիմքեր, և «որևէ բան չի կարող փոխել կամ խարխլել դրանք»:

Իրանական IRNA-ի հաղորդամբ՝ իրանցի պաշտոնյան պատրաստակամություն է հայտնել աջակցելու տարածաշրջանային պետությունների միջև տնտեսական, անվտանգային և քաղաքական հարաբերությունների զարգացմանը, ինչպես նաև անհրաժեշտության պարագայում առաջարկել Իրանի միջնորդությունը։

Իրանցի բարձրաստիճան պաշտոնյան, ի թիվս այլ հարցերի, ընդգծել է ցանկացած տեսակի աշխարհաքաղաքական փոփոխության վերաբերյալ Իրանի սկզբունքային մոտեցումը և ներկայացրել Իրանի տարածաշրջանային քաղաքականությունը։

Ալի Աքբար Ահմադիանը Երևանում է տարածաշրջանային այցի շրջանակում։ Նախօրեին նա Բաքվում էր, որտեղ հանդիպել է այդ երկրի նախագահ Իլհամ Ալիևին։ Այսօր՝ հունվարի 9-ին, իրանցի պաշտոնյային ընդունելու է նաև Հայաստանի վարչապետը։