Civilnet
Վրաստանի իշխող Վրացական երազանք կուսակցությունը դավադրության տեսություններով լի երկար հայտարարության մեջ պնդել է, որ հակավրացական «Պատերազմի գլոբալ կուսակցությունը» վերահսկվում է «Խորը պետության» կողմից:
ԱՄՆ-ի և եվրոպական երկրների կողմից Վրաստանի իշխանությունների դեմ սահմանվող պատժամիջոցների ֆոնին Վրացական երազանքի քաղաքական խորհուրդը երկար հայտարարություն է հրապարակել՝ սուր քննադատելով բոլոր այն երկրներին, հաստատություններին և քաղաքական գործիչներին, որոնք մասնակցել են այդ գործընթացին:
Վրացական երազանքի՝ հունվարի 8-ին հրապարակած տեքստի համաձայն՝ պատժամիջոցները «հակավրացական» քայլ են, որը «խարխլում է վրացական հասարակության վստահությունը արևմտյան հաստատությունների նկատմամբ»:
Ցուցարարների, լրագրողների և ակտիվիստների դեմ բռնության ֆոնին Վրացական երազանքի ներկայացուցիչների դեմ պատժամիջոցներ են սահմանել մի շարք երկրներ, այդ թվում՝ ԱՄՆ-ը, Մեծ Բրիտանիան, Գերմանիան և Բալթյան երկրները:
Վրացական երազանքը պնդել է, որ կոնկրետ երկրի «հակավրացական» դիրքորոշման մակարդակը կախված է նրանից, թե որքան խորն է այնտեղ արմատավորվել «Պատերազմի գլոբալ կուսակցությունը» և որքան ուժեղ են այդ երկրում «Խորը պետության մետաստազները»:
Վրազական երազանքը նախկինում ևս օգտագործում էր այս երկու եզրույթները հակաարևմտյան և հակաեվրոպական հռետորաբանության աճի ֆոնին: Ուկրաինայում պատերազմի բռնկումից կարճ ժամանակ անց այն սկսեց պնդումներ անել «Պատերազմի գլոբալ կուսակցության» գոյության մասին, որը ձգտում է Վրաստանը ներքաշել հակամարտության մեջ և բացել «երկրորդ ճակատ» Ռուսաստանի դեմ:
Վրացական երազանքի բառապաշարում համեմատաբար վերջերս է հայտնվել «Խորը պետություն» եզրույթը, որը հաճախ օգտագործվում է կառավարություններ վերահսկող տարբեր կազմակերպությունների կամ գործակալությունների խմբերը բնորոշելու համար: Դեկտեմբերին իշխող կուսակցությունը «Խորը պետությանը» մեղադրել էր վերջին տարիներին աշխարհում տեղի ունեցած անկարգությունների և պատերազմների համար:
Սակայն չորեքշաբթի օրվա հայտարարության մեջ իշխող կուսակցության դավադրությունն ավելի է խորացել՝ նոր պնդմամբ, որ «Խորը պետությունը» «Գլոբալ պատերազմի կուսակցության» գործիքն է: Այսպիսով, Վրացական երազանքի վերջին գնահատման համաձայն, «Գլոբալ պատերազմի կուսակցությունն» է այն մարմինը, որը վերահսկողություն ունի «Խորը պետության» նկատմամբ:
Վրացական երազանքը պնդել է, որ «յուրաքանչյուր քաղաքական գործիչ և պաշտոնյա, որը հակավրացական հայտարարություններ է անում, լինի նախագահ, վարչապետ, պատգամավոր, Եվրախորհրդարանի անդամ, դիվանագետ, թե պաշտոնյա, «Խորը պետության» ցանցի անդամ է, որը գործում է ոչ թե Ամերիկայի կամ Եվրոպայի ժողովրդի շահերից, այլ «Պատերազմի գլոբալ կուսակցության» ազդեցության ներքո»:
Վրաստանի Իշխող կուսակցությունը փորձել է ամրապնդել իր պատումը՝ հղում անելով ԱՄՆ-ի նախագահի թեկնածու Դոնալդ Թրամփի հայտարարություններին, որը «Խորը պետություն» եզրույթն օգտագործում է դաշնային բյուրոկրատիայի որոշ պաշտոնյաների վերաբերյալ և խոստացել է պայքարել նրանց դեմ՝ հաճախ օգտագործելով «ճահիճը չորացնել» արտահայտությունը:
«Նախագահ Թրամփը [ԱՄՆ նախագահական] ընտրություններից առաջ հայտարարել է, որ կա՛մ Ամերիկան կոչնչացնի «Խորը պետությունը», կա՛մ «Խորը պետությունը» կոչնչացնի Ամերիկան», - նշել է Վրաստանի իշխող կուսակցությունը:
Վրացական երազանքն իր ներկայացուցիչների դեմ պատժամիջոցները բացատրել է որպես «Պատերազմի գլոբալ կուսակցության» ցանկություն՝ Վրաստանում երկրորդ ճակատ բացելու համար: Բացի այդ, այն պնդել է, որ եվրոպական երկրների մեծ մասն այսօր խաղում է «Խորը պետության» խաղը և ի վիճակի չէ պաշտպանել սեփական ազգային շահերը:
Հայտարարությունը Ռուսաստանի ներխուժումը Ուկրաինա նույնպես բացատրում է որպես «Խորը պետության էֆեկտ»՝ չնշելով այն փաստը, որ Ռուսաստանը լայնածավալ ռազմական ագրեսիա է իրականացնում կոնկրետ երկրի դեմ՝ ոչնչացնելով նրա քաղաքները և սպանելով հազարավոր խաղաղ բնակիչների:
Հայտարարությունը կոնկրետ անհատների անուններ է տալիս, ինչպիսիք են ԱՄՆ կոնգրեսական, Վրացական երազանքի խիստ քննադատ Ջո Ուիլսոնը, միջազգային դավադրության տեսությունների հաճախակի թիրախներից մեկը՝ Ջորջ Սորոսը: Իշխող կուսակցությունը Ուիլսոնին անվանել է «դեգրադացված քաղաքական գործիչ՝ զրոյական քաղաքական մշակույթով», իսկ Սորոսի դեպքում Վրացական երազանքը մեջբերել է Հունգարիայի վարչապետ Վիկտոր Օրբանին, որը հայտարարել էր, թե «Սորոսի կայսրությունը» դուրս է մղվում ԱՄՆ-ից, բայց Բրյուսելն դեռ նրա ձեռքում է:
Իշխող կուսակցությունը նաև հիշատակել է ԵՄ-ի դեմ ծայրահեղ աջ շրջանակներում տարածված պնդումները, օրինակ այն, որ «ԼԳԲՏ քարոզչությունը և միգրացիոն քաղաքականությունը» պատճառ են դառնում, որ ԵՄ երկրները «կորցնեն իրենց ինքնությունը»: Իշխող կուսակցությունը այս համատեքստում նույնպես հղում է անում «Խորը պետությանը»:
Վրացական երազանքը վերջին երեք տարիների ընթացքում հաճախ է օգտագործել դավադրության պնդումները, հատկապես Ռուսաստանի՝ Ուկրաինայի դեմ շարունակվող լայնածավալ պատերազմի և Վրաստանում հակակառավարական բողոքի ցույցերի համատեքստում:
2023-ի մարտին օտարերկրյա գործակալների մասին օրենքի առաջին տարբերակի դեմ հանրային բողոքի ցույցերից հետո «Պատերազմի գլոբալ կուսակցության» տեսությունը լրացվեց «ԼԳԲՏ քարոզչության» և «լիբերալ ֆաշիզմի» տեսություններով:
Իշխող կուսակցությունն այս պնդումներն ինտենսիվ օգտագործում է թե՛ ներքին, թե՛ միջազգային քննադատների դեմ:
Միխեիլ Գվաձաբիա, OC Media
Պատմություններ
