Civilnet
Հունվարի 10-ին Ազգային ժողովի պետաիրավական հանձնաժողովի նիստում հավանության արժանացավ ՀՀ պետական օրհներգի փոփոխության նախագիծը և ուղարկվեց Ազգային ժողովի լիագումար նիստի քննարկմանը։
Նախագիծը ներկայացրել են «Քաղաքացիական պայմանագիր» խմբակցության պատգամավորներ Սիսակ Գաբրիելյանն ու Թագուհի Ղազարյանը, ինչպես նաև ԱԺ նախագահ Ալեն Սիմոնյանը։
Նախագծով առաջարկվում է փոխել օրհներգը՝ այն վերադասավորել այնպես, որ ավարտվի հետևյալ քառատնով.
«Նայիր նրան՝ երեք գույնով
Նվիրական մեկ նշան,
Թող փողփողի թշնամու դեմ,
Թող միշտ պանծա Հայաստան»։
Օրհներգի գործող տարբերակում վերջին քառատողն այսպես է հնչում.
«Ամենայն տեղ մահը մի է,
Մարդ մի անգամ պի՛տ մեռնի,
Բայց երանի, որ յուր ազգի
Ազատության կզոհվի»:
Նախագծի հեղինակները նշել են նաև, որ միջազգային պաշտոնական մարզական, մշակութային և այլ միջոցառումների ժամանակ ՀՀ օրհներգը հնչում է տարբեր կատարումներով։ Այդ պատճառով օրենքի փոփոխությամբ կսահմանվի միասնական ձայնագրված պաշտոնական տարբերակ։
Ընդդիմադիր պատգամավորները, սակայն, հայտարարեցին, որ նախագիծը լրամշակման կարիք ունի։ Նրանց կարծիքով՝ զարգացած շատ երկրներ առաջնորդվում են ավանդույթները պահպանելու սկզբունքով. չնայած ժամանակների փոփոխությանը՝ օրհներգները մնում են նույնը։
Պատմություններ
