Իրատեսական չէ յուրաքանչյուր ռուսի վտարումը ուկրաինական հողի յուրաքանչյուր սանտիմետրից. Թրամփի խորհրդական

ԱՄՆ նորընտիր նախագահ Դոնալդ Թրամփի ապագա Ազգային անվտանգության խորհրդական Մայք Ուոլցը հայտարարել է, որ Թրամփի և Ռուսաստանի նախագահ Վլադիմիր Պուտինի հանդիպումն արդեն նախապատրաստվում է: Նրա խոսքով՝ նրանց միջև հեռախոսազրույցը կարող է տեղի ունենալ «առաջիկա օրերին կամ շաբաթներին»:

ABC News հեռուստաալիքի եթերում Ուոլցը հայտարարել է, որ «Ուկրաինայի հարցով համաձայնությունն անհնար է առանց Ռուսաստանի հետ երկխոսության», որի վրա Թրամփի թիմը կաշխատի առաջիկա ամիսներին:

«Բոլորը գիտեն, որ սա պետք է ավարտվի դիվանագիտական ճանապարհով: Ես պարզապես չեմ կարծում, որ իրատեսական է խոսել այն մասին, որ մենք պատրաստվում ենք վտարել յուրաքանչյուր ռուսի ուկրաինական հողի յուրաքանչյուր սանտիմետրից: Նույնիսկ Ղրիմը. նախագահ Թրամփն ընդունել է այս իրականությունը: Եվ կարծում եմ, որ ողջ աշխարհի կողմից այս իրականության ընդունումը մեծ առաջընթաց էր: Այժմ եկեք շարժվենք առաջ: Ինչպե՞ս կարող ենք այլևս չձգել այս հակամարտությունը»,- ասել է Ուոլցը:

«Նախագահ Թրամփի տեսանկյունից՝ անհնար է գործարքի գալ, եթե չկա որևէ երկխոսություն և հարաբերություններ մյուս կողմի [Ռուսաստանի] հետ, և մենք անպայման կհաստատենք դա առաջիկա ամիսներին: Առայժմ դրա համար ճշգրիտ շրջանակներ սահմանված չեն, մենք աշխատում ենք դրա վրա, բայց ես սպասում եմ գոնե հեռախոսազանգի առաջիկա օրերին կամ շաբաթներին: Սա կլինի քայլ, և մենք կշարժվենք առաջ»,- ասել է Ուոլցը:

Նա նշել է, որ պետք է կայունացնել իրավիճակը մարտի դաշտում. «Հարցերից մեկը, որը մենք կբարձրացնենք ուկրաինացիների առջև, կապված է ռազմական ուժի իրական խնդիրների հետ: Հիմա նրանց զորակոչային տարիքը 25 տարեկան է, ոչ թե 18, և ես կարծում եմ՝ շատերը չեն գիտակցում, որ Ուկրաինան կարող էր զորակոչել հարյուր հազարավոր նոր զինվորների: Հետևաբար, երբ մենք լսում ենք բարոյական ոգու խնդիրների կամ առաջնագծում դժվարությունների մասին, մենք ասում ենք՝ լսե՛ք, եթե ուկրաինացիները ողջ աշխարհին խնդրում են աջակցել ժողովրդավարությանը, նրանք իրենք պետք է լիովին նվիրված լինեն այդ գործին»:

«Նրանք, իհարկե, ցուցաբերել են անհավանական քաջություն և զբաղեցրել են ազնիվ և կայուն դիրք, բայց մեզ պետք է, որ մարդկային ռեսուրսների պակասի այս խնդիրները լուծվեն: Հարցը միայն զինամթերքը, զինատեսակները կամ ֆինանսական նոր ներարկումները չեն: Կարևոր է կայունացնել ռազմաճակատը, որպեսզի մենք կարողանանք անցնել որևէ կարգավորման»,- ասել է Ուոլցը:

Հարցին, թե որոնք են իրատեսական ժամկետները Ուկրաինայում հրադադարի համար, Ուոլցն ասել է. «Մենք կցանկանայինք տեսնել հրադադար ցանկացած պահի, ցանկացած օր: Կարծում եմ՝ սա կլիներ անհավանական դրական առաջին քայլը երկու կողմերից, որը թույլ կտա մեզ անցնել դիվանագիտական որևէ լուծման շրջանակների մշակման»:

«Այժմ պետք է շարժվել առաջ: Ինչպե՞ս դադարեցնել այս հակամարտությունը և թույլ չտալ դրա էսկալացիան մինչև մի մակարդակ, երբ արդեն աշխարհը ներքաշվի դրա մեջ: Մենք արդեն տեսնում ենք Հյուսիսային Կորեան, լսում ենք լարված հայտարարություններ Հարավային Կորեայից: Այս հակամարտությունը կարող է ընդլայնվել, և մենք պարտավոր ենք թույլ չտալ դա»,- ասել է Մայք Ուոլցը։