Civilnet
Վրաստանի խորհրդարանի Վրացական երազանք խմբակցության նախագահ Մամուկա Մդինարաձեն, հղում անելով 90 օրով արտաքին օգնության բոլոր ծրագրերը դադարեցնելու ԱՄՆ նախագահ Դոնալդ Թրամփի որոշմանը, հայտարարել է, թե օտարերկրյա գործակալների մասին օրենքի «հնարավոր է կարիքը չլինի»։
Մդինարաձեն նշել է, որ Թրամփի որոշումը կարող է վերացնել թափանցիկության օրենքի անհրաժեշտությունը։ Նա ասել է, թե սա ապացուցում է օրենքի անհրաժեշտությունը, և թող այժմ այս որոշումը «ռուսական» անվանեն։
Երկուշաբթի Սպիտակ տան հրապարակած գործադիր հրամանում ասվում է, որ ԱՄՆ «արտաքին օգնության արդյունաբերությունը և բյուրոկրատիան համահունչ չեն ամերիկյան շահերին և շատ դեպքերում հակասում են ամերիկյան արժեքներին»:
«Դրանք ծառայում են համաշխարհային խաղաղության ապակայունացմանը՝ օտար երկրներում առաջ մղելով գաղափարներ, որոնք ուղղակիորեն հակասում են երկրների և երկրների միջև ներդաշնակ և կայուն հարաբերություններին»,- ասված է հրամանում։
Հրամանում նաև նշվում է, որ Կառավարման և բյուջեի գրասենյակը պատասխանատվություն է կրելու այս դադարը կիրառելու և խորհրդակցություններ անցկացնելու համար՝ որոշելու՝ արդյոք «շարունակել, փոփոխել, թե դադարեցնել օտարերկրյա օգնության յուրաքանչյուր ծրագիր»։ Հրամանը սահմանում է նաև, որ պետքարտուղարը կարող է հրաժարվել դադարից։
Վրաստանի Օտարերկրյա գործակալների մասին օրենքը, որը կոչվում է «ռուսական օրենք», քանի որ նման է Ռուսաստանում այլախոհությունն ու քննադատությունը վերացնելու համար օգտագործվող օրենսդրությանը, քաղաքացիական հասարակության ցանկացած կառույցի կամ լրատվամիջոցի «օտար տերության շահերը սպասարկող կազմակերպություն» է որակում, եթե այն իր ֆինանսավորման առնվազն 20 տոկոսը ստանում է արտերկրից։ Նման կազմակերպությունները ենթակա են մոնիտորինգի յուրաքանչյուր վեց ամիսը մեկ, ինչը կարող է ներառել ներքին հաղորդակցությունների և գաղտնի աղբյուրների հանձնման պարտադրումը: Այն կազմակերպությունները, որոնք չեն կատարում պահանջները, ենթակա են խոշոր տուգանքների:
Վրաստանում քաղաքացիական հասարակության և լրատվական շատ կազմակերպություններ իրենց ֆինանսավորումը ստանում են ԵՄ-ից:
Վրաստանի կառավարող կուսակցությունն ընդունեց արտասահմանյան գործակալների մասին օրենքը 2024-ի մայիսին, ինչը հանդիպեց ուժեղ դիմադրության ինչպես երկրի ներսում, այնպես էլ միջազգային հանրության կողմից։ Օրենքի վերաներկայացումից հետո Վրաստանում տեղի ունեցան բողոքի ցույցեր, իսկ Արևմուտքը նախազգուշացրեց, որ կարող է խոչընդոտել Վրաստանի ԵՄ ձգտումները։
Չնայած օրենքն ուժի մեջ է մտել սեպտեմբերին՝ Վրաստանի կառավարությունը դեռ չի տուգանել կազմակերպություններին կամ հարկադրաբար գրանցել նրանց որպես արտասահմանյան գործակալներ։
Այնուամենայնիվ, կառավարող կուսակցության մի շարք անդամներ, այդ թվում վարչապետ Իրակլի Կոբախիձեն և Մդինարաձեն, հայտարարել են, որ կառավարությունը «պատրաստ է քննարկումների» վիճահարույց օրենքի վերաբերյալ։
Դեկտեմբերին Վրաստան կատարած այցի ժամանակ Եվրոպայի խորհրդի գլխավոր քարտուղար Ալեն Բերսեն ասել էր, որ Վրաստանի կառավարությունը խոստացել է փոփոխել օտարերկրյա գործակալների մասին օրենքի բովանդակությունը։ Այդ նպատակով կստեղծվի աշխատանքային խումբ Վրաստանի և Եվրոպայի խորհրդի ներկայացուցիչների մասնակցությամբ։ Բերսենը նաև հայտնել էր, որ աշխատանքային խմբում կներգրավվի նաև Վենետիկի հանձնաժողովը։
Պատմություններ
