Բրյուսելում այսօր կքննարկվի ԵՄ դիտորդական առաքելության ժամկետի երկարացումը. «Ազատություն»

Հայաստանում ԵՄ դիտորդական առաքելության ժամկետի երկարացման հարցն այսօր կքննարկվի Բրյուսելում՝ Եվրամիության երկրների դեսպանների կողմից։

«Ազատության» թղթակից Ռիկարդ Յոզվյակը հույս է հայտնել, որ առանց անսպասելի խոչընդոտների, դեսպանները կհաստատեն առաքելության մանդատի երկարաձգումը մինչև 2027թ. փետրվարի 19-ը։  Դիտորդների կազմն ու թվաքանակը, ըստ որոշման նախագծի, կմնա անփոփոխ՝ 165 միջազգային ու 44 հայաստանցի աշխատող։ 

Ըստ պաշտոնական փաստաթղթերի, դիտորդական առաքելության գործունեության տարածքը ներառում է հայ-ադրբեջանական սահմանի ամբողջ երկայնքը, ներառյալ Նախիջևանի հատվածը։ Սակայն, առաքելությունն ինքն է նշել, որ առկա ռեսուրսներով հնարավոր չէ վերահսկել սահմանային բոլոր միջադեպերը։ Փոխարենը, դիտորդները կենտրոնանում են կոնկրետ միջադեպերի վայրեր այցելելու վրա և իրենց զեկույցները կազմում են՝ հիմնվելով բաց աղբյուրների և վստահելի վկաների տրամադրած տեղեկատվության վրա։

Չնայած, որ ԵՄ դիտորդներն անզեն են, այնուամենայնիվ պաշտոնական Բաքուն Հայաստանի տարածքում  առաքելության գործունեությունն անընդունելի է համարում։ Ադրբեջանի նախագահը պարբերաբար հայտարարում է, թե դիտորդների ներկայությունը սահմանին անվստահություն է առաջացնում Բաքվի և Բրյուսելի միջև հարաբերություններում։