Ֆուտբոլի ֆեդերացիան՝ հավաքականի գլխավոր մարզչի նշանակումը ձգձգելու մասին

Հունվարի 31-ին Հայաստանի ֆուտբոլի ֆեդերացիան հայտարարություն է տարածել, որում մեկնաբանել է, թե ինչու է ձգձվում ֆուտբոլի ազգային հավաքականի գլխավոր մարզչի նշանակումը։

«ՀՖՖ-ն շարունակում է ինտենսիվ բանակցությունները մի քանի թեկնածուների հետ։ Թեկնածուներից յուրաքանչյուրի հետ ընթանում են անհատական բանակցություններ և հարցազրույցներ, որոնցով պայմանավորված՝  գլխավոր մարզչի վերջնական ընտրությունը ձգձգվում է։ ՀՖՖ-ն անում է առավելագույնը՝ ամենաօպտիմալ տարբերակն ընտրելու համար:

Մոտ ժամանակներս արդեն կունենանք հստակություն՝ թեկնածուների շրջանակի հարցում և կներկայացնենք նրանց ՀՖՖ գործադիր կոմիտեի հաստատմանը», - ասված է հայտարարությունում։

2024-ի հոկտեմբերի 13-ին Ալեքսանդր Պետրակովը հեռացվեց ֆուտբոլի ազգային հավաքականի գլխավոր մարզչի պաշտոնից։ Այդ օրվանից ի վեր հավաքականը գլխավոր մարզիչ չունի։ Մարզչի պարտականությունները ժամանակավոր կատարում է Սուրեն Չախալյանը։ Ֆեդերացիայի նախագահ Արմեն Մելիքբեկյանը դեռ դեկտեմբերին հայտնել էր, որ ազգային թիմի նոր գլխավոր մարզիչը հայտնի կլինի 2025-ի հունվարին։