Անհուսալի վարկեր ունեցող անձանց աջակցման ծրագիրը կսկսի գործել փետրվարի 7-ից

Կառավարության որոշման համաձայն՝ անհուսալի վարկեր ունեցող անձանց աջակցման ծրագիրը կսկսի գործել փետրվարի 7-ից: Միասնական սոցիալական ծառայությունն ամեն օր կազմելու է շահառուների ցուցակ և ուղարկելու է Հարկադիր կատարումն ապահովող ծառայություն՝ օգնելու վարկային խնդիրներ ունեցող քաղաքացիներին:

Հարկադիր կատարումն ապահովող ծառայությունը ցուցակը ստանալուց հետո 3 աշխատանքային օրվա ընթացքում կսահմանի նոր՝ 20% բռնագանձման չափ, նախկին 50%-ի փոխարեն: Սա կվերաբերի ինչպես աշխատավարձին, այնպես էլ պայմանագրային եկամուտներին: Սակայն եթե օրենքով կամ այլ ակտով նախատեսված է ավելի ցածր տոկոս, ապա կգործի այդ ավելի ցածր տոկոսը:

Աշխատավարձից 20% պահումը կսկսի գործել ցուցակում ընդգրկվելուն հաջորդող ամսվա 1-ից և կշարունակվի 2 տարի:

Ծրագրից օգտվելու պայմանները.

1. Դիմումի ներկայացում

- Ժամկետ՝ 2025թ. փետրվարի 1-ից մինչև 2026թ. հունվարի 31-ը

- Դիմել կարելի է միայն մեկ անգամ

- Դիմելու տարբերակներ՝

* Առցանց՝ www.e-social.am կայքով

  * Անձամբ՝ Միասնական սոցիալական ծառայության ցանկացած գրասենյակում

2. Վարկի պայմանները

- Վարկը պետք է լինի անհուսալի՝ առնվազն 3 տարի

- Վարկի մայր գումարը չպետք է գերազանցի 1 միլիոն դրամը

- Վարկը պետք է լինի ՀՀ Կենտրոնական բանկի կողմից լիցենզավորված բանկում կամ վարկային կազմակերպությունում

3. Աշխատանքի պայման

- Դիմելու պահին անձը պետք է ունենա գրանցված աշխատանք։

Հունվարի 31-ի մամուլի ասուլիսի ժամանակ վարչապետ Նիկոլ Փաշինյանը, անդրադառնալով անհուսալի վարկեր ունեցող անձանց ակտիվացման տնտեսական միջոցառմանը, նշել էր, որ կառավարությունն այդ մարդկանց առաջարկում է անցնել թափանցիկ դաշտում աշխտանքի, որպեսզի նրանց աշխատավարձի համար հաշվարկված եկամտային հարկն ամբողջությամբ ուղղվի անհուսալի վարկի մարմանը: 

«Աշխատավարձից բռնագանձման ենթակա գումարի չափը նախկին 50 տոկոսից կնվազի 20 տոկոսի, իսկ բանկերը կներեն հաշվարկված տուգանքների 80 տոկոսը: Բանկերը 20 տոկոսը պահում են, որպեսզի այս ներումից առաջացած իրենց հարկային պարտվորությունները կատարեն»,- հայտարարել էր վարչապետը: