Civilnet
Եվրոպական հեղինակավոր երկու կառույցներ՝ «Եվրոպա Նոստրա» քաղաքացիական ցանցը և Եվրոպական ներդրումային բանկի ինստիտուտը, հրապարակել են Եվրոպայի վտանգված մշակութային ժառանգության օբյեկտների 2025-ի ցանկը։ 14 հուշարձանների թվում է նաև Հայաստանի Տավուշի մարզում գտնվող Առաքելոց վանական համալիրը։ Այս մասին հայտնում են ՀՀ ԿԳՄՍ նախարարությունից։
Նախարարությունից նշում են, որ ծրագրի շրջանակներում նախատեսվում է իրականացնել համալիր միջոցառումներ՝ ուղղված հուշարձանի պահպանությանն ու հանրայնացմանը։ Մասնավորապես, կիրականացվեն գիտական հետազոտություններ, տարածքի բարեկարգման աշխատանքներ, կկազմակերպվեն կրթական ծրագրեր։ Հատուկ ուշադրություն կդարձվի էկոզբոսաշրջության զարգացմանը՝ տեղական համայնքների ակտիվ ներգրավմամբ։ Նախատեսվում է նաև բարելավել դեպի հուշարձան տանող զբոսաշրջային արահետները։
Ընտրությունը կատարվել է` հաշվի առնելով յուրաքանչյուր վայրի՝ ժառանգության առումով նշանակալի լինելու ու մշակութային արժեք ներկայացնելու հանգամանքը, ինչպես նաև ներկա պահին առկա իրական վտանգը։ Հաշվի է առնվել նաև տեղական համայնքների ներգրավվածության և համապատասխան վայրերը փրկելու հարցում պետական ու մասնավոր շահառուների հանձնառության աստիճանը: Չափանիշների թվում կարևորվել է տեղում սոցիալ-տնտեսական կայուն զարգացումը խթանելու ներուժը:
Պատմություններ
