Հայաստանի ու Հնդկաստանի ջանքերն ուղղված են միջազգային ու տարածաշրջանային անվտանգությանը. Պապիկյան

Հայաստանի ու Հնդկաստանի համատեղ ջանքերն ուղղված են ոչ միայն երկրների պաշտպանունակության բարձրացմանը, այլև միջազգային ու տարածաշրջանային անվտանգության, խաղաղության և կայունության ապահովմանը։ Այս մասին Հնդկաստանում հայտարարել է Հայաստանի պաշտպանության նախարար Սուրեն Պապիկյանը, հաղորդում է ՊՆ-ն։

Նախարարը ելույթ է ունեցել պաշտպանության նախարարների՝ «Կառուցել դիմադրողականությունը միջազգային պաշտպանության և գլոբալ ներգրավման միջոցով» թեմայով կոնկլավի ժամանակ։

Պապիկյանը ներկայացրել է տարածաշրջանային անվտանգության հարցերի շուրջ Հայաստանի մոտեցումները, ինչպես նաև ՀՀ կառավարության «Խաղաղության խաչմերուկ» նախագիծը։

Պաշտպանության նախարարի գլխավորած պատվիրակությունը փետրվարի 8-ից Հնդկաստանում է։ Նախարարը փետրվարի 10-ին մասնակցել է Aero India ցուցահանդեսին։  

Aero India ցուցահանդեսն անցկացվում է 15-րդ անգամ։ Առաջին անգամ այն անցկացվել է 1996-ին։ 2025-ին ցուցահանդեսին մասնակցում է արտասահմանյան 150 ընկերություն։

Aero India-ն Ասիայի օդատիեզերական և պաշտպանական ամենամեծ ցուցահանդեսն է։ Այն անցկացվում է փետրվարի 10-ից 14-ը: