Civilnet
ԱԺ նախագահ Ալեն Սիմոնյանը քիչ հավանական է համարում, որ Հայաստանը կընդունի Ռուսաստանի միջնորդությունն Ադրբեջանի հետ բանակցություններում։ ԱԺ-ում լրագրողների հետ ճեպազրույցում նա հայտարարել է, որ յուրաքանչյուր առաջարկ պատրաստ են քննարկել։
ՌԴ փոխարտգործնախարար Միխայիլ Գալուզինը «Իզվեստիա» թերթին տված հարցազրույցում ասել էր, որ ռուսական կողմը միշտ պատրաստ է ցանկացած հնարավոր օգնություն ցուցաբերել Հայաստանին և Ադրբեջանին, եթե նրանք դա ցանկանան։
ԱԺ նախագահը ռուսական միջնորդության վերաբերյալ իր թերահավատությունը հիմնավորում է «անցած փորձով»։ Նրա խոսքով՝ «այն շատ վատ հուշեր է թողել»։
«Մենք շատ հարցերի պատասխաններ մինչ օրս չունենք։ Օրինակ՝ Հայաստանի սուվերեն տարածք ներխուժած ադրբեջանական զորքերի վերաբերյալ ՌԴ դիրքորոշումը, թե՛ ՀԱՊԿ-ի, թե՛ Հայաստան-Ռուսաստան միջպետական պայմանագրի շրջանակում։ Նոյեմբերի 9-ի պայմանագրով ռուս խաղաղապահները պարտավորվել էին պաշտպանել հայ ժողովրդին, հիմա տեսնում եք որտեղ է Ղարաբաղում բնակվող հայ ժողովուրդը, որտեղ են ռուս խաղաղապահները»,- ասել է Սիմոնյանը։
Լրագրողի դիտարկմանը, թե նշված իրավիճակներում Հայաստանն ինչ ակնկալիք ուներ Ռուսաստանից, Սիմոնյանն ասել է, թե Ռուսաստանն առնվազն պետք է գործողություն իրականացներ. «Բայց նույնիսկ քաղաքական գնահատականի չարժանացանք»։
Պատմություններ
