Մյունխենի համաժողովում ԱՄՆ փոխնախագահ Վենսը սուր քննադատել է եվրոպացի գործիչներին  

ԱՄՆ փոխնախագահ Ջեյմս Դևիդ Վենսը Մյունխենում ընթացող անվտանգության ամենամյա համաժողովում այսօր քննադատել է եվրոպական կառավարություններին խոսքի ազատության և քաղաքական ընդդիմախոսների գրաքննության համար՝ հիմնականում խուսափելով Ուկրաինայի պատերազմի կարգավորման հարցից, հաղորդում է Reuters-ը։

Մյունխենի անվտանգության համաժողովում եվրոպացի քաղաքական առաջնորդների, զինվորականների և դիվանագետների առջև ելույթ ունենալով՝ Վենսը զարմացրել է լսարանին՝ հերքելով Եվրոպայում ռուսական քաղաքական միջամտության ռիսկը՝ դրանով իսկ կրկնելով ԱՄՆ նախագահ Դոնալդ Թրամփի դիրքորոշումը, որը քննադատում է ԱՄՆ հետախուզական գործակալությունների պնդումները, թե Ռուսաստանը միջամտել է 2016-ի ընտրություններին:

Վենսը եվրոպացի քաղաքական գործիչներին մեղադրել է սեփական ժողովրդից վախենալու մեջ և զգուշացրել նրանց, որ նրանց ժողովրդավարությանը սպառնացող իրական վտանգը Ռուսաստանից կամ Չինաստանից չէ:

«Եվրոպայի համար ինձ ամենաշատը անհանգստացնող սպառնալիքը Ռուսաստանը չէ, ոչ էլ Չինաստանը կամ արտաքին որևէ այլ դերակատար: Ինձ անհանգստացնում է ներքին սպառնալիքը՝ Եվրոպայի նահանջը իր հիմնարար արժեքներից, որոնք նա կիսում է Ամերիկայի Միացյալ Նահանգների հետ»,- ասել է Վենսը:

Ուկրաինայի ապագան Մյունխենում օրակարգի գլխավոր հարցն էր Թրամփի և Ռուսաստանի առաջնորդ Վլադիմիր Պուտինի միջև այս շաբաթ տեղի ունեցած հեռախոսազրույցից հետո, որտեղ նրանք խոստացել են համատեղ աշխատել հակամարտությունը դադարեցնելու ուղղությամբ։ Վենսը, սակայն, չի անդրադարձել դրան: Փոխարենը նա ասել է, որ Բրյուսելը փակել է սոցիալական մեդիան ատելության խոսքի պատճառով, և քննադատել է Գերմանիային՝ հակաֆեմինիստական մեկնաբանություններ տեղադրելու համար իր քաղաքացիների դեմ հարձակումների, Շվեդիային՝ քրիստոնյա ակտիվիստի դատապարտման, իսկ Միացյալ Թագավորությանը՝ կրոնական իրավունքների հետընթացի համար:

Reuters-ի թղթակցի փոխանցմամբ, կողմնակի սենյակներից մեկում, որտեղ ավելի շատ պատվիրակներ էին լսում Վենսին, մարդիկ ապշած էին և չեն ծափահարել նրան:

Փոխնախագահի ելույթը անմիջապես քննադատության է արժանացել Եվրոպայում:

«Վենսի հարձակումը եվրոպական ժողովրդավարության վրա Մյունխենում, խեղաթյուրելով հենց ժողովրդավարության լեզուն, չպետք է որևէ կասկած թողնի, որ այս վարչակազմի նպատակն է ոչնչացնել ԵՄ-ն և նրա լիբերալ ժողովրդավարությունները»,- ասել է Նատալի Տոչին՝ Istituto Affari Internazionali վերլուծական կենտրոնի տնօրենը:

Պատասխանելով Վենսի ելույթին՝ Գերմանիայի պաշտպանության նախարար Բորիս Պիստորիուսը համաժողովին ասել է. «Եթե ես նրան ճիշտ եմ հասկացել, նա Եվրոպայի որոշ մասեր համեմատում է ավտորիտար ռեժիմների հետ: Սա ընդունելի չէ»:

Վենսը քննադատել է Ռումինիայի ընտրությունների չեղարկումը 

Վենսը հատկապես թիրախավորել է Ռումինիայի դեկտեմբերյան ընտրությունների չեղարկումը, որոնք անվավեր են ճանաչվել երկրի բարձրագույն դատարանի կողմից ռուսական միջամտության մեղադրանքներից հետո։ Ապատեղեկատվության մասին մտահոգությունները նա որակել է «խորհրդային դարաշրջանի տգեղ խոսքեր»:

«Եթե դուք վախենում եք ձեր սեփական ընտրողներից, Ամերիկան ոչինչ չի կարող անել ձեզ համար»,- ասել է Վենսը:

Ռումինիայի նոյեմբերի 24-ի քվեարկությունը չեղարկվել է այն բանից հետո, երբ անվտանգության գաղտնազերծված փաստաթղթերում ասվել է, որ Ռումինիան ընտրական ժամանակաշրջանում եղել է «ռուսական հիբրիդային ագրեսիվ հարձակումների» թիրախ:

Կալին Ջորջեսկուն՝ ՆԱՏՕ-ի նկատմամբ քննադատաբար տրամադրված գործիչը, որը ցանկանում է դադարեցնել իր երկրի աջակցությունը հարևան Ուկրաինային, հոկտեմբերին անցկացված հարցումներում ստացել էր միանիշ տոկոսներ, սակայն անսպասելի հաղթանակ տարել նախագահական ընտրությունների առաջին փուլում:

«Դուք կարող եք կարծել՝ սխալ է, որ Ռուսաստանը գնում է սոցիալական մեդիայի գովազդներ՝ ձեր ընտրությունների վրա ազդելու համար: Մենք, անշուշտ, այդպես ենք կարծում: Դուք կարող եք նույնիսկ դատապարտել դա համաշխարհային ասպարեզում: Բայց եթե ձեր ժողովրդավարությունը կարող է ոչնչացվել օտար երկրից 100,000 դոլարի թվային գովազդով, ապա այն ի սկզբանե շատ ուժեղ չի եղել»,- ասել է Վենսը ներկաներին:

Վենսը կասկածի տակ է դրել Վաշինգտոնի աջակցությունը և ֆինանսավորումը այն բանին, ինչը ներկայացվում է որպես ժողովրդավարության պաշտպանություն և Ուկրաինայի աջակցություն՝ ընդհանուր արժեքների անունից:

«Երբ մենք տեսնում ենք, թե եվրոպական դատարաններն ինչպես են չեղարկում ընտրությունները, իսկ բարձրաստիճան պաշտոնյաները սպառնում չեղարկել մյուս ընտրությունները, մենք պետք է հարցնենք՝ մենք պահպանո՞ւմ ենք արդյոք համապատասխան բարձր չափանիշները»,- ասել է նա:

https://youtu.be/pCOsgfINdKg