Civilnet
Ազգային անվտանգության ռազմավարության փոփոխության անհրաժեշտություն առաջացել է այն փոփոխություններով, որոնք տեղի են ունեցել Հայաստանի անվտանգության միջավայրի շուրջ։ Այս մասին հայտարարել է Անվտանգության խորհրդի քարտուղար Արմեն Գրիգորյանը փետրվարի 20-ի ճեպազրույցում։
Փետրվարի 19-ին վարչապետ Նիկոլ Փաշինյանը որոշում է ստորագրել, որով վերանայվել է ՀՀ ազգային անվտանգության ռազմավարության աշխատանքները համակարգող միջգերատեսչական հանձնաժողովի կազմը։ Հանձնաժողովը կնախագահի ՀՀ անվտանգության խորհրդի քարտուղար Արմեն Գրիգորյանը։
Արմեն Գրիգորյանը չի հստակեցրել, թե որ ուղղություններով են փոփոխությունները լինելու։ Նրա խոսքով՝ մինչ այս հիմնական քննարկումներն աշխատակարգի կանոնակարգի մասին են եղել։
«Ազգային անվտանգության գործող ռազմավարությունը երբ պատրաստվել և հրապարակվել էր 2020 թվականի հուլիսին, դրանից հետո մեծ փոփոխություններ են տեղի ունեցել Հայաստանի շուրջ։ Նաև այդ փոփոխությունների դինամիկան հաշվի առնելով՝ մենք որոշակի ժամանակ սպասել ենք, և դրանից հետո որոշակի հստակեցումներ ունենալով՝ որոշել ենք Ազգային անվտանգության նոր ռազմավարություն ունենալ»,- ասաց Գրիգորյանը։
Վարչապետ Նիկոլ Փաշինյանը հունվարի 31-ին մամուլի ասուլիսի ժամանակ հայտարարել էր, որ Հայաստանն ազգային անվտանգության նոր ռազմավարություն է մշակում:
Պատմություններ
