Ստամբուլում կայացավ ռուս-ամերիկյան բանակցությունների երկրորդ փուլը
Civilnet
ԱՄՆ-ի և Ռուսաստանի պատվիրակությունները փետրվարի 27-ին Ստամբուլում անցկացրել են երկրորդ քննարկումը և նշել դիվանագիտական առաքելությունների աշխատանքի կայունացման առաջին քայլերը: Այս մասին ասված է ԱՄՆ պետդեպարտամենտի մամուլի ծառայության տարածած հայտարարության մեջ:
Ավելի քան 6 ժամ տևած բանակցությունները անցկացվել են ամերիկյան գլխավոր հյուպատոսի նստավայրում՝ Բոսֆորի ափին, հաղորդում են ռուսական պաշտոնական աղբյուրները:
ԱՄՆ ներկայացուցիչները «մտահոգություն են հայտնել» բանկային և պայմանագրային ծառայություններին հասանելիության առնչությամբ, ինչպես նաև հայտարարել են «Մոսկվայում ԱՄՆ դեսպանատան կադրային կայուն և հուսալի համալրման անհրաժեշտության մասին»:
Հայտարարության մեջ նաև ըդգծվում է, որ կողմերը պայմանավորվել են շուտով անցկացնել այս հարցերին նվիրված լրացուցիչ հանդիպում, որի ամսաթիվը կորոշվի ավելի ուշ:
Ամերիկյան պատվիրակությունը գլխավորել է ԱՄՆ պետքարտուղարի Եվրոպայի և Եվրասիայի հարցերով օգնականի տեղակալ Սոնատա Քոուլթերը: Ռուսական պատվիրակությունը գլխավորել է ՌԴ ԱԳՆ Հյուսիսատլանտյան դեպարտամենտի տնօրեն Ալեքսանդր Դարչիևը:
Ռուսական պատվիրակությունը լքել է բանակցությունների վայրը՝ չտալով որևէ մեկնաբանություն մամուլին, հաղորդում է ՌԻԱ Նովոստի գործակալությունը:
Կրեմլի խոսնակ Դմիտրի Պեսկովը հայտնել է, որ բանակցությունները հետևել են նախագահ Դոնալդ Թրամփի և Ռուսաստանի նախագահ Վլադիմիր Պուտինի հեռախոսազրույցի ընթացքում ձեռք բերված պայմանավորվածությանը և Սաուդյան Արաբիայում ռուսաստանյան և ամերիկյան բարձրաստիճան դիվանագետների ու այլ պաշտոնյաների միջև կայացած շփմանը:
Պատմություններ
