Իրանի փոխնախագահ Ջավադ Զարիֆը հրաժարականի դիմում է ներկայացրել

Իրանի ռազմավարական հարցերով փոխնախագահ Մոհամմադ Ջավադ Զարիֆը հրաժարականի դիմում է ներկայացրել, հայտնում է IRNA-ն։

Ջավադ Զարիֆն X-ի իր միկրոբլոգում գրել է, որ երկրի դատական իշխանության ղեկավարն է խորհուրդ տվել հրաժարական տալ։ Նա էլ չի մերժել առաջարկը, նշելով, որ միշտ ցանկացել է լինել օգնող, այլ ոչ թե բեռ՝ երկրի համար։

«Վերջին վեց ամսում  իմ և ընտանիքիս հասցեին ամենաանհեթեթ վիրավորանքները, զրպարտություններն ու սպառնալիքները հնչեցին։ 

Երեկ դատական ​​իշխանության մեծարգո ղեկավարի հրավերով գնացել էի նրան այցելելու։ Անդրադառնալով երկրի պայմաններին՝ նա ինձ խորհուրդ տվեց վերադառնալ համալսարան՝ կառավարության վրա ճնշումները կանխելու համար։ Ես անմիջապես ընդունեցի նրա խորհուրդը»,- X-ի իր միկրոբլոգում գրել է Ջավադ Զարիֆը։

Վարչակազմին մոտ կանգնած աղբյուրները IRNA-ին հայտնել են, որ Զարիֆն արդեն իր հրաժարականի նամակը հանձնել է նախագահ Փեզեշքիանին, սակայն նախագահը դեռ որոշում չի կայացրել։

Մոհամմադ Ջավադ Զարիֆն Իրանի ռազմավարական հարցերով փոխնախագահ է նշանակվել 2024-ին։ Այս պաշտոնին նշանակվելուց հետո Զարիֆը քննադատությունների է արժանացել։ Խորհրդարանականները համարում են, որ Զարիֆի նշանակումը ռազմավարական հարցերով փոխնախագահի պաշտոնին՝ անօրինական է, քանի որ նրա երեխաներից մեկն ԱՄՆ քաղաքացի է:

2013-2021-ին Ջավադ Զարիֆն Իրանի ԱԳ նախարարն էր։ 2015-ին՝ մեծ տերությունների հետ միջուկային համաձայնագրի գլխավոր բանակցող։